【星爺講波 24】德國救星卻奧斯知所進退 天生領袖當完美球員典範

2024 歐國盃踢完今日最後兩場八強賽，四支準決賽隊伍就全部產生，西班牙和法國下周二(7月9日)率先火併，今日產生嘅另外兩支四強球隊就喺周三(7月10日)爭另一個決賽席位。

星爺趁西線明日再次停戰，想講比賽以外嘅事。正所謂「面係人哋俾，架係自己丟」，識得急流勇退，可以名留青史，唔識趣生人霸死地，之前點架勢都好，只會留下污點，隨時衰收尾遺臭萬年！

邊個最有可能衰收尾，星爺唔開名大家都心裡有數，今日想大大聲表揚下球技了得，IQ、EQ一樣高，最重要係知所進退嘅德國隊中流砥柱——卻奧斯。

德國星期五喺八強戰被西班牙以2-1淘汰，同時結束卻奧斯球員生涯，當時球場內出現嘅一幕令星爺有啲感動又有啲感慨。

鏡頭前卻奧斯踢完佢最後一場比賽之後，不論隊友或對手都在尋找他。兩位上賽季皇馬隊友、西班牙球員丹尼爾卡華積和祖斯盧辛馬田，熱情地擁抱並親吻卻奧斯，仲有其他鬥牛兵球員都有向呢位退役後復出，幫助德國重振世界足壇名譽嘅球員表示敬意。

翻查紀錄，34歲嘅卻奧斯可能喺最後一位出生於東德嘅德國國腳，呢位頭腦冷靜嘅中場球員為德國踢咗114場比賽，射入17球。2021年6月29日，德國在歐國盃16強0-2負英格蘭三日之後，卻奧斯宣布退出國家隊。

卻奧斯離開德國隊有幾大影響，德國隊主教練拿高士文最清楚，上年九月接掌德國兵符後，第一件事就係急急「氹」卻奧斯出山。「卻奧斯的職業生涯取得非凡的成就，在很長一段時間內，或許永遠都是德國球員中獨一無二，德國最偉大的球員之一。」

在卻奧斯復出之前，德國大軍的氣氛令人絕望。拿高士文執教嘅前四場比賽，德國成績係1勝1和2負，大家都擔心德國會喺主場舉行嘅2024歐國盃上再次出醜，重蹈2018世界盃以衛冕冠軍身分喺小組賽出局、2022 世界盃小組賽包尾嘅尷尬覆轍。

卻奧斯今年3月復出後情況截然不同，隨即帶領德國在友誼賽取得2連勝，而且對手係法國和荷蘭，全軍士氣大振。總計卻奧斯復出後德國7場未嘗敗績(6勝1和)，第8場才輸給西班牙，嚴格來講法定時間也只係打和，即係無輸過。

好明顯，卻奥斯復出效果完全係立竿見影，歐國盃呢個舞台鞏固咗佢作為德國歷史上最偉大球員之一嘅地位。但星爺欣賞佢球技之外，仲有佢謙虛嘅君子風範，拒絕將重振陷入困境嘅德國足球隊歸功自己，「我們做得比以前更好了，我很高興我能幫上一點忙，這樣至少德國足球又有了希望，有了進步和改善的雄心，我也相信球隊在未來會做到這一點。」

球技、球品、魅力，卻奧斯瓣瓣有，完全係星爺心目中完美球員嘅典範。

T100

【2024年歐國盃期間，加拿大《星島網》每日都會有駐場「球評人星爺」為大家開壇講波，仲搵埋AI幫手預測賽果，人機強強聯手，肯定「近」到無倫！】

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。