【星爺講波 22】八強會師：西班牙德國顛「鋒」對決 葡法「守」得雲開見月明

周五(5日)：西班牙 Vs 德國(加東時間中午12:00)、葡萄牙 Vs 法國(加東時間下午3:00)

 

話咁快，2024歐國盃明日就進入八強大戰，打頭陣係西班牙惡鬥德國，尾場葡萄牙火併法國，爭奪四強席位。

西班牙鬥德國，贏波一隊將會同尾場葡萄牙對法國嘅勝方爭決賽入場券。今場被稱為冠軍前哨戰並不為過，事關西班牙由初賽殺入八強，勢如破竹，上場更清風送爽4-1大破格魯吉亞，盡露冠軍相。至於德國揭幕戰便急不及待顯示爭標決心，5-1大勝蘇格蘭，上場同樣輕輕鬆鬆兩蛋贈丹麥晉級，充分顯示稱霸歐洲嘅實力。

而星爺認為鹿死誰手尚未可料，但肯定兩隊今仗再唔會遮遮掩掩，因為對於兩隊來講，除咗係一場定生死，對手嘅「卡士」亦跟前4場完全唔一樣，所以必定毫無保留，出盡八寶爭取勝利。

星爺會形容呢場係大炮對決，事關德國和西班牙係今屆賽事入球最多嘅兩隊，前4場比賽，德軍入10球，鬥牛兵有9球進帳；加上兩隊又係射門次數最多和傳球準確率最高嘅頭兩位，雖然未必有大手交易，但隨時出現對攻場面，預計會係一場頗為精彩嘅比賽。

至於勝負，我個好拍檔AI預測西班牙法定時間贏波出線，我同意結果，但過程未必咁順風順水，估計會踢埋加時，西班牙先至可以過關。

葡萄牙法國之戰防守定勝負

至於葡萄牙鬥法國，球迷可能會將今場焦點方放喺兩位前鋒隊長身上，另外就是向來崇尚進攻足球嘅兩支歐洲列強嘅火力對決。

但星爺反而會將今場關鍵放喺防守方面，原因之一兩位隊長嘅攻力同時出現樽頸，麥巴比至今只得一球進帳，即使受傷前狀態也未入佳境。C朗更不容提，射失關鍵十二碼之餘，更是六度進軍歐國盃以來首次頭四仗零入球，星爺估計兩人難有作為。

反而要留意防守端幾位球員，隨時成位贏波關鍵，創出歐國盃淘汰賽互射十二碼首三球全數撲出歷史嘅葡軍門將迪奧高哥斯達，狀態有幾弗唔使多講，要破佢十指關談何容易。法國隊防守一樣超強，四場比賽三場零失球，一對防守拍檔祖利斯古迪和威廉沙列巴演出有目共睹，葡萄牙前鋒恐怕要吃唔少苦頭。既然睇好兩軍防守力強横，星爺估計踢足百二分鐘難分高下，互射十二碼後葡萄牙晉級。

AI預測：

西班牙 Vs 德國(加東時間中午12:00)
預測賽果：西班牙勝
半場比分：西班牙 1-0 德國
全場比分：西班牙 2-1 德國
總入球數：3球

葡萄牙 Vs 法國(加東時間下午3:00)
預測賽果：打和
半場比分：法國 1-1 葡萄牙
全場比分：法國 2-2 葡萄牙
總入球數：4球
註：法國在12碼球大戰中獲勝

T100

【2024年歐國盃期間，加拿大《星島網》每日都會有駐場「球評人星爺」為大家開壇講波，仲搵埋AI幫手預測賽果，人機強強聯手，肯定「近」到無倫！】

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。