【星爺講波 21】八強直路：超級電腦睇好西班牙捧盃 英格蘭腹背受壓前路滿荊棘

歐國盃十六強大戰全部順利完成，八支晉級隊伍亦全部產生，各位球迷嘅心水球隊係順利晉級，定係行人止步？

星爺嘅愛隊奧地利就不幸提早畢業，睇到佢哋對土耳其下半場追返一球時，星爺激動到成個從沙發彈起，到最尾1秒鐘頭槌中框，點知龍門雙手拍出，又激動到幾乎連電視機都掟爛！但成王敗寇，唯有講句時不與「奧」，下回請早，也證明要爆冷，除了有實力，運氣絕對好關鍵。

講開冷門熱門，今屆到咗決出八強之後，頂頭大熱門嘅位置卒之有啲變動。一直好「關注」歐國盃嘅著名超級電腦Opta，從開賽到產生16強都認為英格蘭是捧盃大熱門，但唔知係咪電腦都受近輿論影響，抑或經佢個超級無敵大電腦一輪精密運算後，榜首兩雄位置互換，英隊由16強賽前嘅20%成功率跌至18.9%，屈居於由17%升至19.5%嘅西班牙之後，第三至五位分別係法國(18,2%)、德國(17.1%)和荷蘭(9.9%)。

英隊隱憂：比寧咸隨時停賽

星爺覺得英格蘭奪標機會被睇低一級，除咗表現未如理想，可能因為佢仲有一個隱憂，就係比寧咸喺十六強對斯洛伐克入球後涉嫌違規嘅慶祝動作，隨時有機會被罰停賽，間接影響佢哋嘅奪標希望。英軍正處多事之秋，修夫基呢勻真係要絞盡腦汁應對。

至於西班牙，四場入九球，上場4-1大破格魯吉亞予取予攜嘅表現，唔單止超級電腦，我星爺都覺得鬥牛兵依家在八隊之中最有冠軍相。但冠軍相都只係虛名，要成為歐洲王者，都係要靠點運氣，假如連東道主德國呢關都過到，西軍已盡收天時地利人和，等住捧盃啦！

八強會師戲碼

周五(5日)

西班牙 Vs 德國(加東時間中午12:00)

葡萄牙 Vs 法國(加東時間下午3:00)

周六(6日)

英格蘭 Vs 瑞士(加東時間中午12:00)

荷蘭 Vs 土耳其(加東時間下午3:00)

T100

【2024年歐國盃期間，加拿大《星島網》每日都會有駐場「球評人星爺」為大家開壇講波，仲搵埋AI幫手預測賽果，人機強強聯手，肯定「近」到無倫！】

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。