【星爺講波 15】人機估波成功率計數AI:47%/星爺:69% 扒冷推介奧地利

西線連續第二日冇戰事，休息埋明日，後日就會開始十六強捉對廝殺，進入淘汰賽戲肉，趁呢個空檔，星爺同AI又同自己埋下單，睇下估波成績如何？

比賽打咗13日，一共踢咗36場，AI估足36場，星爺估咗13場，如果只計勝、和、負嘅賽果，Al估中17場，成功率係47%，星爺則估中9場，成功率係69%。

老友問星爺，估波點解可以有近七成成功率咁高，特別係E組最後兩場都咁勇估和波，4隊全部得4分都畀我估到？

星爺問心嗰句只係夠運。當時我心諗，兩輪比賽後4隊同得3分，於是從幾位教練嘅角度去思考，萬一輸波，而另外一場和波，登時就變包尾出局，連第三名晉級嘅些微希望都冇埋。所以，4隊嘅策略上應該會傾向求和，因為和波的話起碼仲有爭第三名出線嘅機會，於是把心一橫，反正都係搏下，於是估佢哋會翻版94美國世界盃小組賽成績，結果大話夾好彩畀我估中！

其實星爺估波方程式好簡單，除咗參考往績，會傾向進取，支持弱勢球隊，好聽啲講就係鍾意鋤強扶弱，見到弱隊有小小機會都會投佢地一票；講真嗰句係貪心搏大霧，因為冷門球隊啲賠率通常唔錯，尤其對住所謂大熱門或世界排名前列球隊，相當和味，即使輸個心都覺得抵啲，如果投向熱門球隊，賠率低，萬一輸咗會份外覺得唔抵。

其實AI有接近五成嘅成功率，成績都算係咁，始終佢多依數據行事，傾向熱門都無可厚非。

後日16強開波，星爺會繼續刨冷門，但淘汰賽一場定生死，未必好似小組賽咁多驚喜，所以星爺估波成功率有幾多，個天至畀到答案。

但話時話，如果要星爺推介心水冷門，我會毫不猶豫叫大家留意奧地利和斯洛文尼亞，有睇開今屆歐國盃嘅球迷應該心中有數，我尤其鍾意奧地利，事關佢哋踢法，同星爺估波取向一樣咁進取，我睇好佢地唔止16強咁簡單，複製上屆世界盃奇兵摩洛哥，殺入四強都唔係無可能！

T100

【2024年歐國盃期間，加拿大《星島網》每日都會有駐場「球評人星爺」為大家開壇講波，仲搵埋AI幫手預測賽果，人機強強聯手，肯定「近」到無倫！】