【星爺講波 13】歐國盃死亡E組大亂局 羅比斯烏隨時重演94世盃歷史

重點推介：E組 斯洛伐克 Vs 羅馬尼亞、烏克蘭 Vs 比利時：加東時間周三(26日) (中午12:00)

明日係歐洲國家盃分組賽最後一日賽事，同樣上演兩組共四場比賽，尾場F組捷克對土耳應該幾有睇頭，兩隊為咗爭次名直接出線資格應該會打甩髀。但E組嘅混亂形勢就更加精彩，星爺推介大家約埋幾個波友，搵定兩部電視或電腦或手機，同時睇住兩場波嘅戰況，保證睇到拆天。

經過咗分組賽兩場比賽，E組出現咗四隊同得3分嘅罕有局面，羅馬尼亞和比利時暫時以較佳得失球排呢組嘅首次名，斯洛伐克、烏克蘭分別排第三和四位。換言之，4支球隊數字上都有機會爭首名，同時一樣可以包尾即時執包袱，每個入球或失球都會影響出線或出局嘅形勢。

咁特別嘅局勢，星爺做咗功課，今日唔講兩場比賽形勢，講多小小歷史。原來喺世界頂級足球歷史上，極少出現小組4隊同分嘅情況，最經典同絕無僅有嘅一次出現喺1994年美國世界盃，咁啱又喺E組，同組有墨西哥、意大利、愛爾蘭和挪威，經過咗頭兩輪比賽之後，每隊同樣係取得一勝一負嘅成績。

更加精彩嘅係，最後兩場比賽都打成平手，四支球隊同得4分，得失球差又全部係零，結果墨西哥以較佳嘅得球(3球)取得首名出線資格，而意大利同愛爾蘭得球同為2球，結果要計雙方對賽成績，由於愛爾蘭喺小組賽以1-0爆冷擊敗意大利，所以愛爾蘭最終攞咗次名直接出線資格。不過得到幸運之神眷顧嘅意大利，最終都以小組最佳第三名嘅成績晉級，並且一路殺入決賽，最終只係喺決賽互射十二碼球輸咗比巴西，飲恨屈居亞軍。

明日4隊為保出線機會，都會格外留神，唔會貿貿然出擊，所以戰情可能比較沉悶，預計下半場後半段至會有啲睇頭。星爺個人認為歷史不斷循環，小組4隊再次同分計得失球嘅情況，可能就係明天重演。

AI預測：

E組 斯洛伐克 Vs 羅馬尼亞 (中午12:00)

預測賽果：羅馬尼亞勝

半場比分：斯洛伐克 0-1 羅馬尼亞

全場比分：斯洛伐克 1-2 羅馬尼亞

總入球數：3球

E組 烏克蘭 Vs 比利時 (中午12:00)

預測賽果：比利時勝

半場比分：烏克蘭 0-1 比利時

全場比分：烏克蘭 0-2 比利時

總入球數：2球

F組 捷克 Vs 土耳其 (下午3:00)

預測賽果：土耳其勝

半場比分：捷克 0-1 土耳其

全場比分：捷克 1-2 土耳其

總入球數：2球

F組 格魯吉亞 Vs 葡萄牙 (下午3:00)

預測賽果：葡萄牙勝

半場比分：格魯吉亞 0-2 葡萄牙

全場比分：格魯吉亞 0- 3 葡萄牙

總入球數：3球

T100

【2024年歐國盃期間，加拿大《星島網》每日都會有駐場「球評人星爺」為大家開壇講波，仲搵埋AI幫手預測賽果，人機強強聯手，肯定「近」到無倫！】