星8卦｜「博命」受「高人」寵幸 落難有「浪子」幫忙夠期協議分手

對於「博命」同「浪子」行唔到尾，大家都有啲詫異，因為兩個人都有晒經歷，「浪子」有幾個老婆，生咗一堆細路，以為同「博命」一齊就可以定落嚟。

「博命」有自知之明，同「高人」一齊之後，簡直係富豪級享受，出入私人飛機，仲喺「高人」嘅環頭橫行稱霸，佢有段時間以為自己係皇后，而且「高人」真係錫到佢燶，畢竟後生有名氣，對於男人嚟講都係一種征服。可惜一朝天子一朝臣，「高人」個老竇唔掂，影響埋佢嘅前途，而佢之前又太大膽，以為自己可以坐上一哥嘅位，竟然用方法令到自己嘅「兄弟」差啲命都無。

「兄弟」一旦上位就梗係同你計數，你想我死，我亦都唔畀好日子你過，結果當然係「高人」鬥輸，全部家當無晒，仲要連累九族。「博命」喺未殺到埋身嘅時候，已經同有關當局申報利益，話願意拎番晒喺「高人」嗰度拎到嘅利益，於是你肯投城而利字當前，「博命」就可以甩難。所以大家都奇怪佢幾時同「浪子」撻着？又點解咁快可以結婚？原因好大部分係兩個人協議好「浪子」係幫「博命」避難，而中間係有感情嘅，不過薄弱啲，分開係協議之一，只係有細路係意料之外啫！

【相關文章】：

星8卦｜「姣精」冧掂「一號」以為享福 衰貪心一鋪過自斷米路

星8卦｜「打得」感激「公子」栽培 討厭老公怕事膽小離婚再拼博

星8卦｜「番妹」「巴佬」痴戀多年做得成夫妻 全靠前妻助攻三人世界好融洽