杭州亞殘運｜13歲小飛魚吳卓恩 榮幸為港隊得首面獎牌

杭州亞殘運周一迎來開賽日，香港隊即在打開頭炮的游泳項目迎來首面獎牌，現年13歲的吳卓恩，早前8月在殘疾人游泳世錦賽獲100米蛙泳銀牌，兼奪2024巴黎殘疾人奧運會入場券，她在女子S6級100米背泳中，游出1分33秒37 ，獲得其首面亞殘運銅牌，為港增光。

圖：中國香港殘疾人士體育協會

女子S6級100米背泳共有5名泳手參賽，首戰亞殘運的吳卓恩做出44秒96分段時間排第3，最終以1分33秒37完成，屈居兩名中國代表蔣裕燕（1分20秒58）及諸吉（1分28秒79）之後，取下銅牌。

賽後卓恩都分享咗佢嘅感受，「首先好榮幸可以為港隊喺今屆亞殘運奪得第1面獎牌，對於攞到獎牌自己都好開心，今日初頭有少少慢，轉身之後就越嚟越順，呢個都係個人最好成績，我希望嚟緊嘅比賽都可以發揮到更好，我想多謝家人同教練比我機會攞到呢面獎牌。」

圖：中國香港殘疾人士體育協會

至於總教練江俊賢都話滿意卓恩嘅表現，「其實佢嘅對手都好強，第1名係亞洲紀錄，賽前預計卓恩係第2至第4名，因為報名時間大家都好接近，睇吓臨場發揮邊個會比較好，卓恩一開頭比較慢熱，過咗25米之後越游越順，做到個人最佳時間，對佢整體表現感到滿意。佢嘅主項100米蛙泳會喺第4日比賽，希望佢之後發揮越來越好。我作為教練對於卓恩可以成為今屆亞殘運港隊第1個獎牌得獎者，都覺得好光榮同驕傲，希望佢之後繼續有機會再上頒獎台。」

圖：中國香港殘疾人奧委會

卓恩將會喺10月26日星期四出戰佢嘅主項100米蛙泳，大家繼續為港隊打氣。

--