「御用小人物」羅青浩罕現人前 市儈佬變鬍鬚大叔 曾誤傳死訊得啖笑
有「御用小人物」之稱的羅青浩，在80年代已經活躍影視圈，演出不少經典劇集，最為人記得，除了在拍《城市故事》中飾演市儈佬郭通天（Victor）外，還有在《流氓大亨》飾演萬梓良的弟弟方學斌。直至1990年，羅青浩拍完亞視劇集《海瑞鬥嚴嵩》後，淡出了幕前，久未公開露面的他在2018年一度誤傳出死訊，原來他已經移居泰國生活，日前接受楊紹鴻的YouTube節目訪問，久違的的羅青浩比當年發福了少許，臉上留有鬍鬚，感覺穩重了不少。
【相關文章】：資深藝人湘漪女兒盡得真傳曾踏足娛圈 貼80年代女星合照掀集體回憶
【點擊睇羅青浩近況】：
入行多年的羅青浩向來非常低調，當時連淡出娛樂圈亦未有人留意，直到2018年重播《流氓大亨》，他的近況惹起網民關注，想不到竟然誤傳死訊，吳啟華曾代友澄清：「有朋友跟他保持連絡，我知道他不是你們講的那樣，我知道他生活得不錯。」訪問上重提當日誤傳死訊，羅清浩說︰「嗰時我仲喺香港，忽然之間收到朋友電話，話有記者搵我，我仲無啦啦搵我做咩？我離開電視圈都有10幾年，點知朋友話『有人話你死咗喎』，我就話『吓！係呀？阿彌陀佛』，後來啟華有幫手，有記者搵佢問我嘅近況，佢有講我近況，唔係去嗰個level，我就話可以留個電話畀我搵記者啦，但佢就冇咗件事，不了了之，其實都冇咩影響嘅，呢行基本上都好多誤傳，我又覺得冇咩嘢，誤會啫！」
因為電視台換老闆而退出娛樂圈
談到當年退出電視圈原因，羅青浩坦言因為電視台換咗老闆：「最初我入去ATV時係林百欣年代，跟住公司換咗老闆，好多人事變動，公司話唔簽咪唔簽囉，我應該係2000年離開，最後一齣劇係《海瑞鬥嚴嵩》，去上海同無錫拍。」回復自由身後，羅青浩未有再簽其他公司：「我份人好得意，我覺得人生有好多可能性，唔一定做一份工做到走為止，我好細個就出嚟做嘢，出版社、紙盒廠，每份職業到某個階段，就會諗係咪時候轉一轉？你話我念唔念舊都好，我係鍾意新嘅事情，啱啱有個老友做速遞，叫我入佢公司幫手，緣分到咪去試吓！」
自認孤兒仔工作不靠人事
羅青浩續說：「有冇留戀電視圈？唔到我留戀，佢又唔簽，求佢又未必求得到。而且我又好怕靠人事，一來我好似孤兒仔咁，我係參加比賽而入行，唔同訓練班出嚟，佢哋有師兄、導師提點又可以去問，好多嘢都有前輩畀意見。我係參加比賽贏咗而走入電視台，人又唔識，部門又唔清楚，派到有通告就返去開工，初期咪做啲閒散角色，自己盡量勤力啲讀熟劇本，希望有啲表現。」羅青浩更說：「我個人又冇乜大志，唔會同人爭，況且爭得到未必好，隨遇而安，唔需要框住自己喺度搏命做，好多時唔係你希望嘅嘢就一定實現到。」至於會否復出拍劇？羅青浩說：「真係冇諗將來想做咩，睇吓自己條件符唔符合，符合到就做，符合唔到又唔會勉強。」
>>>星島網WhatsApp爆料熱線(416)6775679，爆料一經錄用，薄酬致意。
>>>立即瀏覽【生活百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
