草蜢40周年世巡首站獻新加坡 台上憶恩師梅艷芳：冇佢就冇草蜢

草蜢「GRASSHOPPER THREE IN LOVE CONCERT草蜢演唱會2026」新加坡站周末（20日）順利完成，全場爆滿，草蜢表示特別將40周年世界巡迴演唱會海外首站選在新加坡，因為恩師梅艷芳第一次帶他們出埠演唱正是新加坡，意義重大。阿智台上說：「我哋草蜢世界巡迴嘅第一站要揀新加坡，因為呢度對我哋三個好有淵源，我哋第一次跟梅姐出埠，就係嚟新加坡！」全場歡呼。傑仔問：「邊個1986年有嚟睇梅艷芳演唱會？」台下有Fans舉手，草蜢好驚喜。阿智說：「沒有梅艷芳就沒有草蜢，所以我哋想將呢個舞台獻俾我哋嘅師傅梅艷芳，多謝佢當年帶我哋嚟到新加坡認識大家，我哋要搵返我哋嘅初心，多謝你哋支持草蜢40年！」

蘇志威感激門票秒殺注強心針

蘇志威說：「好多謝你哋一知道我哋要嚟開演唱會，第一時間買飛，好早就賣爆晒，多謝你哋嘅支持，為我哋世界巡迴打咗第一支強心針！」觀眾反應非常熱情，完場後樂隊已退場、觀眾席開了燈，仍不肯離開，大嗌encore。草蜢一邊戴耳機一邊行返上舞台，阿智說：「你哋仲唔走？啲歌真係唱晒啦！」傑少說：「Band都走晒喎！」阿智說：「我哋下一站去馬來西亞，你哋掛住我哋就嚟啦！」然後他們演唱《暫停·開始過》，並向所有Fans揮手道別。

草蜢40周年世巡以新加坡為首站。

傑少依然狀態甚勇。

蔡一智感激門票秒殺注強心針。

兩兄弟同台。

蘇志威傾盡全力。

好有氣氛。

3人台上感謝恩師梅艷芳。

極視聽之娛。

大唱冧歌。

3子台上憶恩師梅艷芳。

唱出經典金句。

3人落力地唱。

40年來同樣合拍。

又唱又跳。

帶病上陣的傑少仍然令人感動。

觀眾非常熱情。

草蜢巡唱四面台轉三面台另類震撼。

傑少身形好FIT。

3兄弟珍惜一起時光。

新加坡站加設傳波波遊戲。

兩人在台上啟動遊戲。

草蜢多謝觀眾40年愛戴。

向觀眾致謝。

觀眾不捨得離場。

蔡一智帶動全場氣氛。

唱出多首快歌。

蔡一傑享受舞台。

蘇志威晒胸肌。

孫燕姿送上花籃。

仲有JJ林俊傑的心意。

蔡一智憶40年前首搭飛機「毛管戙」

演出後草蜢受訪，阿智說：「真係非常、非常、非常多謝新加坡嘅Fans，好熱情！40年前梅姐帶我哋第一次到海外登台就係新加坡，20歲仔人生第一次搭飛機，所以我哋對新加坡有情意結，私心要揀返呢度做40周年演唱會嘅巡唱第一站。剛才有Fans舉手話86年有睇梅艷芳演唱會，睇過我哋表演，真係毛管戙啊！」雖說新加坡觀眾比較內斂，但草蜢的Fans特別熱情，阿智說：「好少會開晒大燈都唔走，呢啲『真encore』，盛情難卻，其實我哋三個都唔捨得走！現場澎湃嘅歡呼聲，好似喺球場睇『世界盃』比賽咁勁！」

草蜢巡唱四面台轉三面台另類震撼

傑少表示開心見到來自世界各地Fans專程飛到新加坡捧場，說：「好多Fans睇過香港站演唱會話正，話要再睇，特登飛嚟睇！」阿智說：「佢哋就醒目啦，香港紅館四面台，嚟到新加坡三面台係有另一種感覺，感受到製作團隊嘅心思，不一樣嘅震撼！」蘇志威說：「好多朋友話睇完今晚新加坡站想繼續睇，咁就要撲馬來西亞站嘅門票。」

草蜢新加坡站加設傳波波為Fans「做運動」

除了草蜢演唱會「傳統」與觀眾玩人浪，今次新加坡站加設觀眾傳波波遊戲，全場玩得勁開心，氣氛超好，阿智笑說：「知道好多Fans平時讀書、返工，冇時間做運動，所以加咗『碰碰波』遊戲，掂到個波嘅Fans都得到草蜢嘅愛。至於馬來西亞站都有新花臣，𠵱家申請緊，希望成功，大家到時感受一下我哋為大家準備嘅心意！」而香港演唱會的「情歌盲盒」環節亦帶到巡唱，每晚不同驚喜，今次新加坡站演唱《我們都是這樣失戀的》和《永遠愛着你》。

草蜢大排檔偶遇撲飛失敗Fans

傑少透露前一晚綵排後去食消夜，遇到一位廿四孝媽咪，她見到草蜢後即通知兩個囝囝飛車趕到大排檔見偶像，他們表示因為撲飛失敗，無緣入場感可惜，好彩場外偶遇，更得到草蜢在他們的tee上簽名留念，非常開心。阿智揚言在新加坡食到超好味海南雞飯，期待馬來西亞食肉骨茶和榴槤。