【專訪胡渭康】重臨加國 風采依然 感謝養父母培育之恩

【星島記者專訪】提起胡渭康，相信很多讀者不會陌生，1980年代與孫明光、林利組成的男團小虎隊，一首《伴我啟航》中「哪吒不怕海龍王，幼獅不畏虎和狼」的歌詞令人印象深刻。40年後的今天，胡渭康仍風采依然，保養有道之餘亦保持著開朗心境。他在《星島頭條》的專訪中憶述，在過去40多年的演藝歌唱事業中，曾試過遠赴英國從事不同的行業，之後又回流香港再戰娛樂圈，認為這是最好的人生體驗，更不忘感謝養父母多年來的培育之恩。

胡渭康（William）對於溫哥華也不陌生，除了以往有來過溫哥華工作外，也有不少摯友居住在溫哥華，「溫哥華係一個人傑地靈嘅地方，天氣環境都好好。不過估唔到今次遇上熱浪，感覺有少少熱。除咗工作以外，我也可以探下朋友，同埋好掛住溫哥華啲美食。」

疫情學會真正體驗生活

William 在新冠疫情後再赴加拿大參加新時代電視 30 周年台慶，「3年疫情日子好似很難過，大家過咗啲唔知點過嘅生活，回顧返過去 3 年，好似真係唔知做咗啲乜。過去 3 年疫情我喺香港的工作量減少咗好多，但係我做多咗運動，行多咗山。原來喺香港行山好 Enjoy，真正體驗到香港環境好好，四面環海，喺香港生活咗咁多年，其實一直冇發現原來香港嘅自然環境咁靚。」

William 在 1981 年參加 TVB《歡樂今宵》的「似模似樣」單元，模仿陳百強演唱《眼淚為你流》，1982 年參加第一屆新秀歌唱大賽後出道，1984 年與孫明光、林利組成男團「小虎隊」，為電視劇《新紮師兄》演唱主題曲《伴我啟航》，歌曲播出後馬上成為家傳戶曉的歌曲，直到 40 年後的今天，曲中一句「哪吒不怕海龍王，幼獅不畏虎和狼」仍是人們經常哼唱的旋律。

英國生活 大開眼界

他回顧在英國的生活，雖然在當地沒有從事演藝事業，但形容那段充實的日子會畢生難忘，「我好細個就入咗娛樂圈，所以冇讀到大學。去到英國後就去讀下英文、讀下電腦，先增值自己，跟住自己喺當地又有做 skin care 的生意，後來冇做自己生意，就去搵工，最後去咗幾個國際時尚品牌工作，開闊自己的眼界。」

問及當年選擇赴英發展，放棄香港的演藝事業是否會感到可惜？胡渭康表示：「當時已經 30出頭，自己對於前路有少少迷茫，我問我自己究竟繼續做娛樂圈就咁一生？所以我當時計劃去英國take a break，冇想到一過去就 7 年。」「我絕對冇後悔當年選擇去英國的決定，人生冇話值唔值得，呢個過程其實係一個人生經歷，我覺得呢種經歷非常寶貴。」

「邊個生我都唔係最重要…我好幸福」

William 在英國工作生活 7 年後，因為養父母身體出現問題，所以決定回流香港，「我剛剛返到香港後嘅一段時間，其實都係主要照顧屋企人，爸媽有老人癡呆症，我照顧佢哋嘅生活。香港娛樂圈好細，好多朋友知道我回流後，開始問我有冇興趣拍下戲，唱下歌，最後我又重投身演藝事業。」

雖然養父母不是自己的親生父母，但 William 非常感謝養父母視如己出。他透露其實小時候已經感覺到自己不是親生，但一直沒有開口問父母，他憶述說：「我細細個已經 Feel 到爸媽唔係親生，但我一路唔出聲，我父母對我非常好。我記得我媽咪喺我好細個的時候去做手術，我睇到佢病歷的血型寫住 O型血，到我大個仔時發現自己係 AB 型，讀書嘅知識話我知，O 型血生唔到 AB 型，我就開始懷疑自己嘅身世。」

「直到我 30 幾歲的時候，我媽咪親口同我講我係養子。其實我覺得邊個生我都唔係最重要，我凈係知道養大我果個系一個好人，對我好，所以我好幸福。」

William 小時候已經非常喜歡表演唱歌，「養父母一路都非常支持他的演藝發展，我媽咪好好，佢見我咁鍾意唱歌，就請老師返嚟教我唱歌，純粹係因為我嘅愛好，我嘅所有決定，佢哋都會非常支持。」

Next Step: 全新的胡渭康

對於最近的工作情況，William 透露返香港後會準備下年 1 月的演唱會，近月亦在雙語劇集《Cross My Mind》首次用英文背台詞，他一直勇於接受挑戰，給觀眾帶來一個全新的胡渭康，「我當年喺英國就已經 set 好要學好英文的目標，學語言最緊要個環境。無論拍戲定係做司儀，我覺得死記硬背係行唔通，應該用心去感受，了解角色嘅設定，明白整個角色嘅發展，先會得心應手。」

William 在整個訪問中，為人風趣幽默，平易近人，與以往公仔箱中的嚴肅角色有所不同，他更為身邊的朋友及工作人員不斷帶來歡樂，經常傳播著正能量，胡渭康就如大家的開心果，儘管入行已經 40 年，他的風采不遜於當紅小生，依然是玉樹臨風。

採訪撰文：Justin Wong

攝影：Trevor Wong