古天后日誌｜內房民企又爆雷碧桂園恐成恒大2.0

2023年08月09日 07:00

港股｜ 8月9日，大致天晴，下午局部地區有驟雨，日間天氣酷熱。繼美國被評級機構調低信貸評級後，隔晚又到另一評級機構穆迪下調美國多間中小型銀行嘅信貸評級，警告風險增加，拖累大市氣氛，道指一道跌逾400點，幸而尾市三大指數跌幅收窄。不過道指仍要跌158點；標指跟納指則分別跌19點及110點。留意標指短線支持為4,400至4,450，跌穿此水平或令美股進一步下調，並出現更大幅度調整。

除咗銀行股有沽壓外，重磅科網股亦捱沽，中概股跌幅更為顯著，反映中概股嘅金龍指數一度跌逾3%，拖累夜期一度失守萬九大關，低見18,893點。

本來噚日港股已因為人民幣走軟，以及最新進出口數據差過預期而下跌，加上內房7月份銷售進一步放緩，以及碧桂園（2007）出現違約，股債雙殺拖累整體內房股表現，均令港股受壓。恒指今日定必考驗19,000點大關，而50日線約19,200點水平由支持變為阻力，若然失守19,000點大關，短線或下試18,800點，甚至18,500點水平尋找支持。

碧桂園爆鑊，再加上內房7月份銷售進一步放緩，反映阿爺之前所謂嘅救樓市措施未見成效。正當中國恒大（3333）債務重組計劃有待本月進行表決之際，民企龍頭房企碧桂園據報未能如期在周一（7日）支付兩筆美元票據利息，即使設有30日寬限期，已率先被資本市場視作違約，市場對開發商的信心再一次跌至谷底，致令內房股債周二均遭到恐慌式拋售，恐怕碧桂園成為恒大2.0。

早前預告上半年錄虧損嘅碧桂園稱，受近期銷售額與再融資環境持續惡化，批股又泡湯，加上各類資金監管影響，公司帳面可動用資金持續減少，公司已承認出現階段性流動壓力。其實之前旗下子公司碧服（6098）有管理層減持，公司未出事先跳船，已經係預警碧桂園隨時出事。

阿爺一邊話要救內房，但那邊廂又增添市場憂慮，噚日無啦啦話萬達集團副總裁劉海波據報被公安機關帶走，或涉及萬達內部反貪腐。雖然有關消息未經實證，但足以令本來嘅內房板塊添煩添亂。

古天后已多次警告，內房債務問題一日未解決，內房物管股都不能沾手，呢兩個板塊只會有波幅，冇升幅，就以碧桂園為例，由年初每股高於3元跌至現水平約1.1元，咁又唔見咗六七成，邊個位入場都係送死。雖然間中偶有反彈，亦不過係一次又一次嘅跳車逃生機會。內房產業鏈拖累整個中國經濟發展，難怪就算已復常重啟經濟一段時間，內地經濟亦未能如期復甦。