古天后日誌｜港股反彈或近尾聲 20日線為短線關鍵

6月8日，天氣炎熱，日間短暫時間有陽光，間中有幾陣驟雨，局部地區有雷暴。喺下周美國議息前，加拿大意外加息，美國10年債息推高120點子，咁嘅情況下，科技股終於見回吐，納指跌逾1%，標指跌16點，但道指卻升91點。暫時美國表現開始反覆，市場等待下周議息，留意標指能否守住4200點，下一個較強支持位為4100點。

值得留意呢一轉三大指數不斷向上挑戰高位嘅同時，美股成交未有跟上，升勢更過份集中於幾隻重磅股FAAMG，其他股份表現好壞參半，一旦呢幾隻龍頭股一回頭，美股轉勢機會好大。不過市場資金仍然較為關注美股，只要美股有較大回調，就會有趁低吸納買盤，沽壓未必太大，只係第二季經濟表現麻麻，下次業績期出嚟嘅成績表，應該比較難睇。

加拿大意外加息0.25%，市場更偏向美國6月唔加息，7月都要加息，但息口見頂機會亦大增，只係目前通脹仍然高企，可能要待11月先有減息機會。若息口保持高企一段時間，估計對累積一定升幅嘅科技股構成壓力。留意高風險資產如比特幣，加上監管風暴再起，再次失守27000關口，資金開始偏向保守。

中概股隔晚表現反覆，阿里及京東分別回吐2%左右，恒指ADR衝高後亦要回吐64點，收於19187。目前恒指正在20日線爭持。本論反彈有機會初步完成，尤其噚日成交額進一進收窄至900億之下，基本反彈亦無資金入場追貨，好難支持大市進一步反彈。

內地經濟不景氣，出口數字跌幅超過期，內地資金推崇嘅中特股，升勢開始無以為繼，睇返A股表現，卻每況愈下，創業板指數更回落至年內低位，兩市成交更縮水至8100億，A股都自身難保，又何以寄望北水可以支撐港股。北水近日喺港股只係短線炒作，今日買完明日沽，變心快過打針。留意下半年開始基建項目要陸續上馬，即係資金要喺A股抽走去應付開支，亦係A股近日疲弱嘅原因。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。