【譚俊彥專訪】疫後首赴加國懷念昔日留學生活 視帝之路非一帆風順

 

【星島頭條專訪】2021年憑《換命真相》的時光獲得用奪最佳男主角，榮登視帝寶座的譚俊彥（Shaun Tam）疫後首度赴加， Shaun 日前接受《星島頭條》專訪，跟讀者分享他的從影及生活軼事。

Shaun 入行20多年，曾試過做歌手、北上發展、最後返港簽約無線，以男主角先後出演多部經典劇集，作品包括《包青天再起風雲》、《換命真相》、《法政先鋒IV》、《十八年後的終極告白》，成功「入屋」勇奪視帝，從「狄龍個仔」變身成為新一代師奶殺手。

與加拿大關係匪淺

原來 Shaun 與加拿大有著莫大淵源，他形容加拿大是一個讓他學會獨立、茁壯成長的地方，十分感激父母當年給予留學的機會，讓他的人生更豐富，眼界更開闊。他補充說：「喺另一層面，多倫多係我求學嘅地方，溫哥華就係我最多回憶的地方，我同太太喺溫哥華相遇相知，呢個地方見證咗我哋嘅相愛。」

與此同時，Shaun 除了非常喜歡溫哥華的環境及氣候，也特別喜歡加拿大那種人與人之間的和諧關係，「我喺加拿大倍感親切，在大街上無論係陌生人，或者唔係太相識的人，大家都會很有禮貌同對方 Say Hi，在香港和內地卻少咗呢種文化。」

Shaun 在疫情後再度來到溫哥華，他笑言非常想念溫哥華的日本餐廳、海鮮、以及楓葉美景，他亦形容這場時隔3年的旅程別具意義，「現在大家終於除低口罩，睇到大家的笑容是最開心的事情。溫哥華的氣候非常舒服，我落機後第一感覺就係心曠神怡，溫哥華的 House 好靚，成為我搵錢的動力。」

半工讀靠自己

作為狄龍的兒子，或許很多人會先入為主，認為 Shaun 當年一定過著富裕的留學生活。不過 Shaun 直言自己並非「要乜有乜」，都要去打工賺零用錢。他笑著說：「好多留學生抵加後，父母都會買部車比佢哋代步。我反而好多謝我爹哋媽咪冇買車畀我，馬死落地行，我唯有搭地鐵去打工番學。但其實都冇壞，我少咗飲珍珠奶茶的機會，同埋冇咁多時間去玩，更多時間用喺讀書同打工賺零用錢。喺呢段日子，我能夠真真正正接觸社會、學習人與人之間的溝通，同時亦讓我成長不少。」

老婆仔女重於一切

Shaun 入行 23 年，簽約無線前曾經做過歌手，也試過北上發展。8年前，當藝人們紛紛北上吸金，Shaun 卻毅然選擇回港發展，加入TVB。他表示：「去到人生呢個階段，我需要一個比較 stable 嘅時間。雖然喺TVB 拍戲係好辛苦，但好處就係我可以返屋企，經常與一對仔女見面，每日收工後可以返屋企食飯，家庭和子女對我來說，目前係最重要的。」

Shaun 承認簡單的家庭生活，是他最嚮往的東西，「以前喺國內拍戲只能一張電話卡打漫遊長途同屋企人聯繫，費用好貴。宜家我哋可以通過視像通話，有時我喺境外拍戲，雖然同家人天各一方，但依然可以互動。好似我喺溫哥華呢兩日，雖然有 jet lag（時差），但係我一樣可以喺電話聽到個女彈鋼琴，一邊聽一邊瞓，我覺得我好似喺佢身邊陪住佢，拉近我同佢哋嘅距離。」

「Struggle 足廿年」

從「狄龍個仔」搖身一變，成為新一代師奶殺手，Shaun 的視帝之路並非一帆風順。「我入行 23 年，話長唔長，話短唔短，爸爸到宜家都仲係反對，主要係擔心我太辛苦！可能你見我呢 3 年發展得唔錯，但其實此前足足 Struggle 咗 20 年，好彩近 3 年終於穩定落嚟，真正能夠以演員為職業。但我清楚唔係每個人都可以做到，如果問我會唔會反對子女加入娛樂圈，我可能會有保留，但我唔會用舊嗰套思維，一定要畀佢地試咗先。」

「時光係我最鍾意嘅角色」

「我覺得每一個角色都是不同的挑戰，如果你有留意我嘅作品，你會發現我會隨著角色嘅 character（個性）去改變我自己，其實係好辛苦嘅一件事。」Shaun 表示經常要飾演一些很沉重的角色，卻與現實生活中的自己有很大的出入。「其實我個人係比較中意講嘢，拍攝後點樣從劇本中抽離，避免介入自己生活，係演戲嘅最大挑戰！」

談到讓他取得視帝寶座的角色──《換命真相》的時光，他說：「時光係一個fiction嘅角色，其實我好喜歡穿越內容。戲中可以睇到時光對 Hailey（鄧佩儀飾演）嘅愛，以及同朴寶劍的友情等等，我覺得時光這角色十分完整，係我最鍾意嘅角色。」

「另外，我也喜歡《十八年後的終極告白》的林朗生、《十八年後的終極告白2.0 》的姚尚謙，主要睇到佢哋陰暗的一面，我試過不同的角色演繹。」

Shaun 亦分享說，當時拍攝《換命真相》時，同時為《拳王》拍攝宣傳海報，所以觀眾當時見到的 Shaun 變得越來越瘦，這是因為要迎合角色需要，「喺TVB的工作強度下，大家喺 Multi task下做好多嘢，當時讓我學習咗好多，可以話轉捩點喺從時光那個角色開始，因為由那個角色開始我直至攞獎，到現在都非常深刻。」

想走笑匠路線

勇奪視帝後想作哪些嘗試？Shaun則笑著說自己想嘗試飾演喜劇角色，「我唯一拍過嘅喜劇角色就係《失憶 24 小時》，其實真係好開心，日後想走comedy 路線，拍多啲開心嘅角色。我嘅作品屋企人套套都有睇，成日做殺人嘅角色其實都好攰，開心角色嘅話，屋企人睇到都會開心啲！」

Shaun 亦透露，他將會在大灣區拍攝一套商戰題材的劇集，形容今次終於可以做一次「強人」，「好似醫生強人又插唔到入去啦，緝毒強人又唔預我，好在商業強人有我分，我希望會有新火花啦。」

寄語加國讀者

他最後對加拿大的讀者說：「你哋中意嘅，日後如果有個題材可以嚟加拿大拍，講下加拿大華人嘅生活，我覺得好多人都會有共鳴， 因為加拿大嘅華人係一個好特別嘅community嚟嘅，大家非常團結同友好，我希望日後能多啲返嚟。」

撰文： Justin Wong

攝影： Harrison Ha

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。