頭條戲場丨《隱閉中年》撐住唔好死

《隱閉中年》翻拍自17年在港上映的瑞典電影《想死冇咁易》（A Man Called Ove），曾獲第89屆奧斯卡最佳外語片提名，身兼《隱》監製及主演的湯漢斯一早𥄫中想重拍。電影正式上映一周場次唔多，如此高質好電影真的不能只有我睇到。劇本生動幽默非常出色，估唔到咁大驚喜，好鄰居同屋企有貓的重要性，一套睇到眼濕濕，非常高分的治癒系温情喜劇。(上映中)撰文:廖思慧

因為老婆離世又被炒魷，Otto覺得做人好苦，所以無時無刻都好想死。

 

Otto睇咩都唔順眼長期西面。

 

一名厭世中年漢Otto(湯漢斯飾)，性格古怪，睇乜都唔順眼，街坊放狗走去鬧隻狗、狂轟鄰居越線停車、對送貨員大吵大鬧，無時無刻翻白眼，好聽啲叫憤世嫉俗，唔好聽正一死廢老。不過好彩廢老由湯漢斯演繹，佢真係好適合演呢類臭脾氣老頭子，少少乞人憎再加啲啲可愛兼暗藏善良，有趣又有愛。

Otto每日都會鬧爆鄰居越線停車。

 

廢老唔鍾意同鄰居打招呼。

 

唔好做「豬」呀
飾演牢騷王Otto的湯漢斯對角色有唔同見解，「Otto跟一般頑固老人唔同，佢認為左鄰右里若要生活和諧，首先要關心社區狀態，每個人先可以好好享受，好好生活。」簡單嚟講，即係唔好做「豬」，關心身邊人及事，先可以好好過日子。

想死唔容易
Otto因為喪妻生不如死，每日都想跟埋死鬼老婆一走了之，但次次想死都死唔去，真係命運弄人。湯漢斯為Otto解釋，「佢唔想咁快退休，佢唔想老婆咁快離去，佢唔想所有嘢咁快變老… 突然間，佢唔想再面對咁樣嘅狀態，佢想作個了斷，再跟老婆一齊。時間及失去，成為Otto人生最後階段嘅最大敵人。」

好好活下去
劇本出色之餘，飾演Otto的大肚新鄰居Marisol (Mariana Treviño飾)亦非常搶眼，多場跟湯漢斯的對手戲睇到又笑又喊，教車一幕緊張加爆笑程度可以納入教材。因為Marisol 如父女間的愛，令本來相當絕望的Otto重新搵到做人的意義，電影感人之處在於鄰里間的溫情互動，以及Otto跟愛妻的浪漫回憶。雖然現今世界一地歪理又病態百出，正因為日子唔好過，我哋更應該好好地過。

大肚新移民鄰居跟Otto互動搞笑又有愛。

 

新鄰居將囡囡畫嘅畫送畀Otto，務求用家庭溫暖融化他。

 

Otto手抱嘅係流浪貓，呢個係全片敗筆，邊可能有咁靚嘅流浪貓呀?

 

電影成功靠幽默劇本之餘，亦全靠Mariana Treviño真誠又出色的表現。

 

屋企有貓真係好重要，睇吓Otto個樣變得幾和善。

 

Marisol 的兩個囡囡同Otto相處融洽。

 

呢幕都好好笑，小丑被打都抵死嘅。

 

全片最可愛角色​ 。

 

 

 

 

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。