世界盃2022｜專欄:東洋武士格食「格」

十六強比賽已開打，相信各位朋友都係一路睇住自己愛隊比賽，一路思潮起伏。由翼衛杜費斯帶領下以3:1擊敗美國率先晉身八強嘅荷蘭，無論用波定係後防表現，比起分組賽明顯淡定得多。而阿根廷嘅美斯先入一球，及比賽尾段利辛度馬天尼斯與達米安馬天尼斯各有一次關鍵封阻下，有驚無險以2:1戰勝澳洲。

以往有睇開《足球小將》嘅朋友，都應該會記得有場日本對巴西嘅夢幻對決，如果想喺今屆世界盃見證到呢場比賽，咁嚟緊十六強嘅賽事，日本先要擊敗克羅地亞晉級。日本喺對德國同埋西班牙嘅分組賽，充分發揮到防守反擊嘅威力，尤其係對西班牙嘅比賽，更以不足兩成嘅控球率取得勝利，亦令德國及西班牙自六六世界盃有數據統計以來，成為僅兩支全場有七百次以上的傳球次數，但九十分鐘內落敗嘅球隊。喺領隊森保一嘅帶領下，充滿速度及爆發力的三笘薰和堂安律，相信會繼續成為改變比賽嘅重要棋子。

克羅地亞方面，中場三大長老莫迪歷、波索域及高華錫中場控制力絕對毋庸懷疑，偏偏日本要發動反擊正是要出現被對手控制比賽的局面，反而格食格，筆者睇好東洋武士更進一步。  - 球樂

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。