「星洲龍」能過超人關？

上周最震撼地產界新聞，並非樓市繼續下瀉，而是誠哥又出招，繼幾年前天價出售中環中心，搞到接貨者無不「雞毛鴨血」後，又再發功！今次接貨的，並非中資財團或本地炒家，而是「星洲過江龍」。
　　
一出手，就以二百零七億元全掃長實半山區波老道豪宅，平均方呎價六萬一千元。
　　
市場中，一買一賣，賣方當然認為「啱價就賣」。買方呢，一定以為執到筍嘢。加上今次長實開出的條件，真的非常「筍」，因竟然願意借埋錢畀你買我的「筍貨」，出手就是一百億元。仲有，成交期可以長達兩年半。
　　
睇個局，真係有請君入甕之感，唔……
　　
究竟呢個新加坡基金背後的揸Fit人，對超人有幾犀利，知唔知呢？睇牌面，好似一嚿雲，非常似上世紀七十年代日本及九十年代內地的暴發戶一樣，堅信明天必定會更好，以及錢一定會繼續來，故才重錘借錢出擊。
　　
印證一個現象，過去一年，新加坡實在太多錢湧入，人人以為錢必定天天跌下來，故開始有「魚翅撈飯」心態。
　　
眾所周知，誠哥在全球皆有投資，除佢自己眼光超班外，更有大量分析專家提供服務，令佢充分掌握市場走勢，其功力實在大超班，在香港，根本無人能及。
　　
睇歷史，除咗上世紀八十年代收購美麗華一役輸畀李兆基外，大致上是長勝將軍。
　　
分析市場走向，真係叻到飛起。最巴閉一次，為一九九八年，劈價兩成出貨，將盈翠半島三千個單位全面套現，快過所有仍儍吓儍吓的對手，盡吸當時的購買力。之後樓市大大鑊，一直冧到二○○三年才見底。是否神一般的眼光？
　　
當然，二○一八年出售中環中心，更是「震驚江湖」。比五至十個巴仙（市價）你賺。然後，綁你上車，結果，個個損手爛腳蝕三成！
　　
今次呢條「星洲龍」與超人拗手瓜。我睇，哈哈，輸硬！極大機會兩年後蝕完息（借下一百億元），再要以「儍仔價」賣返畀長實。睇吓中唔中先。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。