潘九龍廚藝頂瓜瓜

香港飲食界，乃一個自由市場，挖角之風甚為厲害，所以，老闆們要留得住功力高的廚師，非常頭痛，因不時有同業出更高人工撬牆腳也。尤其「一個唔好彩」被封米芝蓮，更將是痛失良將先兆。
　　
大廚是一家食肆的靈魂，一換人，水準可能立即急跌。若如此，熟客會忍一次。但再一次也不合水準，必會靜靜雞拜拜，反正可試的新店以百計！
　　
例如浙江菜及上海菜，香港也有不少名店，不過，強如上海總會，近兩年口碑也非常麻麻。小弟去過五次，三次唔得，兩次得，得的兩次因由重量級人馬訂位，大廚自然打醒十二分精神，不得有誤，故仍保持水準及神采。
　　
過去十年歎浙江菜，江湖公論，水準以灣仔浙江軒最穩定，由招呼到出品，絕少突然失手。上周此會所老友生日請客，席設浙江軒董事房。正！裝修雅致具品味外，更重要有私人洗手間，唔使行出行入與公眾爭位。單單呢項服務，收費已值加二！
　　
菜單開出，未食已流晒口水。冷盤有六味：寧波脆鱔、麻辣皮蛋、香乾馬蘭頭、葱油海蜇頭、冰鎮鵝肝、醉豬脷。
　　
喂喂，八人一席，食完個頭盤，已飽咗一半。幸而紅白酒無限量供應，幫助快速消化。
　　
浙江軒開餐，招牌菜當然有：火瞳老鴨燉津白、蝦籽京葱大烏參、目魚紅燒肉、清蒸鰣魚、鰣魚汁煮麵、鮮肉鍋貼及香煎八寶飯等等，全部高水準。
　　
不過，有一味超水準，苔條蝦仁拼黃金鍋巴，真係正斗到呢……唔多識形容。浙江菜，一定有炒蝦仁。不過，此處大廚在肥嘟嘟鮮爽的蝦仁邊，圍滿香口到爆炸的黃金（上滿鹹蛋黃炸）鍋巴，簡直是神來之筆，伴冰凍白酒，一咬，味蕾飛天，食神上身耶。
　　
立即要求經理佘笑芳請出大廚鞠躬致謝。
嘻嘻，原來大廚名潘九龍，真好玩。
「係呀，碌Sir，我弟弟叫潘香港㗎！」
地址：灣仔駱克道300號浙江興業大廈一樓
電話：2877 9011（要先入會）

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。