古天后日誌|美股繼續探底 港股結算前轉倉等下月陪跌

9月27日,多雲,間中有一兩陣驟雨,日間短暫時間有陽光。美股仍然下跌,標指跟道指隔晚再跌逾1%,納指則死貓彈完再復跌,而道指已跌穿6月低位,標指跟納指則回試6月底部,近日淡倉有回升跡象。不過喺美債息高企下,科技股及高增長股嘅估值難免受壓,而8月份嘅反彈,亦只不過係熊市之中嘅反彈,並非真正轉勢,如今FOCM已表明為控制通脹,仍會大力加息應對,估計下月聯儲局再加息之前,美股仍有機會繼續向下尋底,要美股見底,可能最快都要等到下個月。俗稱恐慌指數嘅VIX升至32,當升穿28反映市場預期波動正在上升,係市場睇法轉淡既導向指標之一。VIX守住28持續上升,美股後市仍然係淡。

雖然美股今輪跌勢略為收歛,不過喺過去十個星期,美股錄得超過600億美元資金淨流出,而美元基金相返錄得輕微資金淨流入,反映市場傾向持有現金,喺環球股市偏弱情況下,cash is king就係硬道理。而目前唔少基金經理管理嘅基金,現金水平高達6.1%,係呢21年以嚟最高。

市場憂慮經濟衰退,油價近日急,已跌穿80美元水平,油價自失守92美元之前橫行區底部,就呈現一浪低於一浪嘅跌勢,油價下一個支持區,係68至75美元,睇下油價會否喺悲觀情緒下,繼續向下尋找支持。雖然油價回落,但對歐洲高企嘅通脹毫無幫助,主要係美匯指數持續向上,升抵115水平並未見顥著回落,睇嚟會喺高位橫行整固,歐元已跌穿1算,為20年以嚟低位。而英國更提出自殺式減稅方案,更令英鎊一瀉如注,英鎊跌至37年以嚟新低,睇嚟為免英鎊繼續下墮,英倫銀行喺下個月逼不得已都要加息1%。全球息率向上,令借貸成本增加,資金流向美元償還美債,就連美股呢個美元資產區亦要下跌,其他股市面對資金流出,所承受嘅壓力更大。

人民幣唔覺唔覺累計都跌咗超過一成,過去多年中國受惠歐美資金流入,內地企業已習慣長期有平錢可借,未能一如以往以新債冚舊債,內地唔少企業已陷入債務危機。喺人民幣走弱下,內地企業經營更困難,A股後市都係瓜多過菜。至於港股過兩日就係期指結算,呢幾日期指將會有頻繁嘅轉倉活動,呢幾日波動難免。而由上個月底期指結算後,由20000點反覆喺9月份內跌至17700水平,淡倉已錄得逾2000點利潤,估計呢幾日轉倉,可能喺現水平附近。若然淡友仍未放手,喺現水平再轉倉做10月繼續做淡,再乘美股近日持續尋底之勢,睇怕港股喺10月上旬持續走弱,暫時想買貨都要忍一忍手,待下月再出多個底先考慮入場。

訂閱星島網singtao.ca電郵快訊,每天可收到最快新聞資訊: https://cloud.marketing.ccue.ca/singtao_subscribe

【看星島*知天下】請立即下載「星島新聞(加拿大版)」App:
iPhone:https://apple.co/2IBi812
Android:https://bit.ly/2Pe8anu
share to wechat

延伸閱讀

share to wechat

延伸閱讀

鮑威爾「放鴿」 日圓升穿137關見3個月高位 報136.39

雷添良:將香港建設立綠色金融中心 制定可持續發展報告標準

古天后日誌|大市成功挑戰100日線後回補9月中裂口

林永德獲任星展香港董事總經理 接替張建生

都市網新聞