遊客就是財神

睇走勢,好快「0+7」會實行,再鬆多一步。效果會點,尚待觀察,因「3+4」後,來港遊客未見增長。
  
將心比己,全世界咁多美麗城市已通晒關,唔使打針唔使撩鼻唔使戴口罩唔使隔離唔使乜碼物碼,你係遊客,你會否願搞到成身汗來香港旅遊?
  
答案當然係——No!所以,「3+4」對旅遊業,根本冇幫助。唯一,係必須來港工作、經商,又或急需回港探望家人者,無奈接受。
  
好嘞,「0+7」又如何?小弟問多位旅遊業內人士點睇。一致指出:「慘!香港勢必大出血,兼且流血不止!」
  
何來此話?正因香港人,尤其中上收入者,已滯在香港三年,冇得郁。嘩!若一旦回港唔使坐「防疫監」,仲唔飛身作報復性旅遊?一個係咁,一百個係咁,一千個係咁……一萬到十萬個都會係咁。
  
呢班報復性向外的旅遊大軍,你話嘞,會使走幾多香港錢?必定天文數字,深不可測!
  
事實,我身邊已有N個老友卜定半年機票,將三年的旅遊費一次過環遊世界,由日韓泰國開始,再到歐洲澳洲,然後美加!
  
咁呢個「0+7」政策,咪變失血政策?
  
找二○○三年揸Fit專搞Inbound旅遊的業界高人問:「老哥,可以點搞返旺香港呢?你最富經驗噃!」
  
「碌Sir,呢單嘢,並非旅遊界問題,是整個香港問題!當年沙士之後,不少城市為搶遊客,一通關,立即津貼航空公司推出廉價機票,津貼酒店大減價,與所有主題樂園議定遊客入場大折扣。總之,遊客就是財神,一定要用盡方法吸佢哋來消費,以谷起個勢。所以,一定要由政府最高層統籌及出手。若果全面開關在望,今日就要立即開始做嘢!尤其航空公司都停擺咁耐,冇三兩個月,根本難以起動!」
  
其實跑馬也是香港吸引遊客的重點,尤其快活谷!今晚全捧沈廄:「包裝風雲」、「想見你」、「人和家盛」及「日輝煌」!

訂閱星島網singtao.ca電郵快訊,每天可收到最快新聞資訊: https://cloud.marketing.ccue.ca/singtao_subscribe

【看星島*知天下】請立即下載「星島新聞(加拿大版)」App:
iPhone:https://apple.co/2IBi812
Android:https://bit.ly/2Pe8anu
share to wechat

都市網新聞