游客就是财神

睇走势,好快“0+7”会实行,再松多一步。效果会点,尚待观察,因“3+4”后,来港游客未见增长。
  
将心比己,全世界咁多美丽城市已通晒关,唔使打针唔使撩鼻唔使戴口罩唔使隔离唔使乜码物码,你系游客,你会否愿搞到成身汗来香港旅游?
  
答案当然系——No!所以,“3+4”对旅游业,根本冇帮助。唯一,系必须来港工作、经商,又或急需回港探望家人者,无奈接受。
  
好嘞,“0+7”又如何?小弟问多位旅游业内人士点睇。一致指出:“惨!香港势必大出血,兼且流血不止!”
  
何来此话?正因香港人,尤其中上收入者,已滞在香港三年,冇得郁。哗!若一旦回港唔使坐“防疫监”,仲唔飞身作报复性旅游?一个系咁,一百个系咁,一千个系咁……一万到十万个都会系咁。
  
呢班报复性向外的旅游大军,你话嘞,会使走几多香港钱?必定天文数字,深不可测!
  
事实,我身边已有N个老友卜定半年机票,将三年的旅游费一次过环游世界,由日韩泰国开始,再到欧洲澳洲,然后美加!
  
咁呢个“0+7”政策,咪变失血政策?
  
找二○○三年揸Fit专搞Inbound旅游的业界高人问:“老哥,可以点搞返旺香港呢?你最富经验噃!”
  
“碌Sir,呢单嘢,并非旅游界问题,是整个香港问题!当年沙士之后,不少城市为抢游客,一通关,立即津贴航空公司推出廉价机票,津贴酒店大减价,与所有主题乐园议定游客入场大折扣。总之,游客就是财神,一定要用尽方法吸佢哋来消费,以谷起个势。所以,一定要由政府最高层统筹及出手。若果全面开关在望,今日就要立即开始做嘢!尤其航空公司都停摆咁耐,冇三两个月,根本难以起动!”
  
其实跑马也是香港吸引游客的重点,尤其快活谷!今晚全捧沈厩:“包装风云”、“想见你”、“人和家盛”及“日辉煌”!

订阅星岛网singtao.ca电邮快讯,每天可收到最快新闻资讯: https://www.singtao.ca/subscribe/singtao.php

【看星岛*知天下】请立即下载“星岛新闻(加拿大版)”App:
iPhone:https://apple.co/2IBi812
Android:https://bit.ly/2Pe8anu
share to wechat

都市网新闻