Juicy叮｜公屋媽苦惱送學業平平女兒出國留學 抑或花近百萬買樓

一名港媽在「親子王國」討論區發文，表示女兒讀書成績平平，而手持約百萬元現金，猶豫應該送女兒出國留學，抑或在港用作買樓首期。

媽媽解釋，一家人住實用面積約350呎的公屋，現年15歲的女兒學業成績一般, 性格內向，如果將來無法在香港升讀本地大學，擔心將來人生路好難行，其他家人又施壓。她現在手持接近100萬元現金，不知該如何是好，「究竟應該畀佢出國留學or買綠置居(約250萬）」。

發文者坦言，「其實我自己都偏向買樓多啲，香港地最緊要有瓦遮頭，雖然我年紀都唔細，但勉強仲有能力供綠置居，但其他人覺得我自私，勉強都仲可以供佢去外國讀書，點解唔為佢將來鋪好條路，佢哋全部都覺得無張沙紙就係死路一條」。她又解釋，「擔心將來如果個女做老姑婆起碼有瓦遮頭」，「計過如果樓價$250萬，借150萬分15年，每月供款大約一萬蚊左右，我年紀唔細㗎啦，盡量唔想拖咁長」。

網民認為要視乎女兒學習能力以及意願才決定是否送出國留學。《親親我好媽》示意截圖

有網民就建議，「要睇佢有無心想讀，或者有無target將來向邊個方向發展，如果佢無心機讀，就算畀佢去外國讀，未必一定有成績，或者再睇下其他學校」、「我向來覺得唔係讀書材料唔好勉強讀上去，要讀佢自己將來出黎做野再進修先會認真讀的。」、「有心讀香港都可以讀， 點解一定要出國？使一大筆錢， 如果本身讀書麻麻出國讀都改變唔到幾多。唔好諗住出過國留學好吃香」。

有人則認為，「大把例子岀國讀完返來都是量地。我係你一定買樓做首期。係有心讀既請佢係香港畀心機好好讀，上唔到大學依家多了好多途徑可駁返上去。而唔係用100萬去買個海外學位咁就叫有生路行」、「大把人喺外國讀完書返嚟都係搵緊萬零二萬蚊嘅工咋」。

發文者最後指，「我諗呢兩年寧願洗多啲錢迫佢補習，務求令佢成功入香港嘅大學，如果勉強去外國入啲三線大學，認受性我相信同副學士無分別，咁不如留返啲錢睇吓之後再做其他用途」。

帖文轉載自「親子王國」討論區

星島新聞集團慶回歸25周年專題網站，請即瀏覽

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。