專欄 蘇哈仔│曼聯亂局始於拉舒福特回歸

連續三季，曼聯都係開局差勁，今季還增添了球員公開抨擊管球層和教練的亂局。然而有一點完全無法想像，就係魔將居然會同卡域克鬧不和，究竟係幾時出現？大膽推測係始於拉舒福特回歸時。

曼聯今夏一直尋求放售拉舒福特，在巴塞隆拿拒絕買斷後，曾傳出過拜仁慕尼黑等意羅致，之後輪到沙特阿拉伯球隊、土耳其豪門。記得當時的傳聞，是指紅魔需要一位左翼，曼聯高層考慮到放走福仔大約僅收到不到3000萬歐羅轉會費，這筆資金不會買到實力相若之人，決定留用他，俾卡域克當新援用，而後者又沒有拒絕。

拉舒福特回歸成最高薪球員

拉舒福特未回歸前，B費係曼聯最高薪球員，還要是斷崖式領先，以他去季破英超助攻紀錄的表現來說，相當合理。第二檔就係根夏、施斯高、麥比奧莫等，他們去季貢獻良多，薪金配得上場上表現。然而福仔回來就拎頂薪，人工與場上表現不符，要知道實力從來不是拉舒福特的問題，而是他態度懶散，踢法太獨食，多位主帥更視他為更衣室毒瘤，放入球隊很容易帶來負面影響。

出力不出力，隊友不滿，情緒蘊藏，成績唔好就一次過爆發。C朗拿度當年回歸，破壞更衣室平衡，當日沒有拒絕他來投的蘇斯克查，要賠上帥位。卡域克沒有堅持阻止拉舒福特重返球隊，亦要承受惡果。當然最大的問題，還是掌握轉會權的領導層﹗蘇偉業