蔡天鳳碎屍案｜指鄺球收45萬茶水錢後再借40萬 譚澤均：一蚊都無還過

28歲名媛蔡天鳳（Abby Choi）2023年2月疑遭殺害後碎屍肢解，蔡天鳳前夫鄺港智、前家翁鄺球、前夫兄長鄺港傑被控謀殺及阻止合法埋葬屍體罪。案件踏入第18日審訊，蔡天鳳家翁、譚方駿父親譚澤均出庭作證，透露得知其子欠下賭債後，由蔡天鳳介紹鄺球協助處理還債事宜，鄺球表示要先收取30萬元「茶水錢」後才著手處理，事件完結後又稱「好多兄弟做咗嘢㗎，都俾啲錢佢哋飲下茶啦」，因此譚澤均另再支付15萬元，及後鄺球再致電借款40萬元，譚澤均借出25萬元後指鄺球「一蚊都無還過」。

停車場遇5惡相追數人

譚方駿父親譚澤均憶述，其子譚方駿於2022年頭欠下賭債，某日譚澤均前往政府指定接種新冠肺炎疫苗時，將私家車停泊在葵芳的停車場，當時對面車位大約有5個人下車「話俾我聽Abby欠債」，形容該些人「惡形惡相」。譚澤均遂問對方「欠咩債」，然後得知「佢（蔡天鳳）同我個仔喺澳門賭錢」，賭錢輸了後「Abby就簽咗張紙，欠債500萬」，惟尚未還清欠債。譚澤均回應「我新抱應該無賭錢」，對方則指「可能係你個仔賭，Abby做擔保嘅」，並留下聯絡電話要求譚澤均處理。

鄺球被指為譚澤均處理譚方駿欠債時，不只一次要求收取茶錢，後來提出要求借錢40萬。

黑衫人屋外徘徊

譚澤均續指，他其後回家詢問譚方駿及蔡天鳳有關欠債事宜時，二人確認欠債但不打算還款，指賭場太陽城集團倒閉，因此欲「睇下電視有咩進展先」，惟譚澤均則認為「既然欠咗債就還錢啦」，並指「我嘅考慮係還錢可以，但係要清清楚楚，搞清楚件事，搞清楚條數，唔好有手尾」，補充道當時追債人仍有用訊息聯絡「叫我還錢」，更目睹「有啲着黑衫嘅人喺我屋企門口徘徊」。譚澤均為免追債人騷擾其家人及孩子，因此欲「揾渠道找數」。

找鄺球望在律師樓盡快處理還款

譚澤均透露「我從Abby口中知道佢嘅前家翁鄺球係前差人」，因此由蔡天鳳介紹鄺球給他認識，此前從來不認識鄺球。譚澤均憶述，當時鄺球建議譚澤均先前往報警，譚澤均照辦後鄺球稱「佢差館仲識啲人，可以幫我加快處理」，譚澤均坦言「但係我之後並唔覺得呢件事有加快處理，我依然俾人追債」，因此問鄺球會否有其他方法處理「例如揾江湖人士」，而鄺球則表示「佢有辦法」後介紹了他的友人，譚澤均明言「希望唔係用江湖嘅方法，係用有根有據嘅方法，例如上律師樓」。

鄺球收30萬元茶水錢後再收6萬「律師費」

譚澤均表示，鄺球其後表示要先收取30萬元「茶水錢」後才著手處理，因此譚澤均向鄺球支付了30萬元現金，隨後「鄺球就同我講律師樓開始做嘢，佢朋友會同追債呢班人聯絡」，譚澤均指鄺球聲稱的「佢朋友」理應是指師爺，鄺球更保證「你放心我會同你搞掂」。譚澤均提及約於同年3月中左右，鄺球表示「搞點啦，處理好啦，同個邊傾好可以係律師樓到處理」。控方關注，譚澤均有否上過律師樓時，譚澤均回應「鄺球同我講我唔需要上，佢會搞掂晒」，而印象中律師樓收費約6萬元，惟不清楚費用「究竟俾咗鄺球定係送咗張支票上去（律師樓）」。

按要求將500萬元存鄺球戶口再付15萬元「飲茶錢」

譚澤均續指，鄺球在3月中要求他存入500萬元至其滙豐銀行戶口。控方關注，鄺球有否解釋為何是存入其個人戶口，而非律師樓戶口時，譚澤均明言「其實我當時係有問號，但係當時已經無再俾人騷擾，我就覺得佢做到嘢，做到嘢就OK啦」，並指他人如何處理事件並不重要，最重要是結果。譚澤均直言，鄺球在事件處理完結後仍偶爾致電他「仲有啲嘢要搞搞」，又指「好多兄弟做咗嘢㗎，都俾啲錢佢地飲下茶啦」，因此譚澤均另支付15萬元予鄺球。

鄺球要求借款40萬 譚澤均只借25萬至今未收回

譚澤均另透露，在約2022年尾時鄺球曾致電向他借錢，譚澤均稱「佢問我借40萬」，鄺球指「因為嗰500萬存咗入佢戶口，佢俾商業罪案調查科查緊，所以佢個戶口就凍結咗，咁因為臨過年喇，佢需要啲錢用」。譚澤均直言「我借咗25萬俾佢」，補充指「Abby同我講過，呢個人信唔過」，惟因「佢曾經幫我解決過呢件事，我都決定幫佢，但係唔係佢要求嗰40萬，只係俾咗25萬」現金，譚澤均形容「我哋喺旺角交收」，強調「喺旺角警署門口」，但鄺球「借完錢之後一蚊都無還過」。

無預期必定收回借款

譚澤均供稱，自己沒有與鄺球討論過還款方式，直言「自從我新抱同我講話，鄺家啲人非常之差之後，我已經有戒心」，因此才沒有全借40萬給鄺球，更指「其實我心裡面預咗，還（就）開心，唔還（就）唔打算追㗎啦。」。

鄺港傑、鄺球、鄺港智同被控1項謀殺罪及1項阻止合法埋葬屍體罪。控罪指3人於2023年2月21日，在大埔汀角路龍尾村56B村屋地下內謀殺女子蔡天鳳，並在2023年2月21日至23日期間，於同地阻止合法埋葬蔡天鳳的屍體。三人否認謀殺罪，鄺港傑及鄺港智承認阻止合法埋葬屍體罪，鄺球則不承認阻止合法埋葬屍體罪。

本案以英語進行，由暫委法官祁彥輝（Brian Keith）審理，控方由外聘資深大律師郭莎樂（Charlotte Draycott）、高級助理刑事檢控專員梁育珩、高級檢控官林曉敏及吳希樂、檢控官尹培軒代表，鄺港傑由大律師Trevor Beel代表，鄺球由大律師戴偉奧(Oliver Davies)代表，鄺港智由大律師安華暉(Andrew Raffell) 代表。

案件編號：HCCC198/2025
法庭記者：劉曉曦 黃巧兒