邱傲然新歌MV東京取景穿梭經典日劇場景 遇颱風便利店買雞都難
MIRROR成員邱傲然（Tiger）昨日推出全新個人單曲《新歌》，繼續沿用合作無間的天衡一手包辦作曲、編曲及監製，並由朱凱鋒填詞，以全新音樂風格呈獻給廣大樂迷。《新歌》講述一段遺憾的愛情，男主角深愛對方，卻因外界因素或現實處境而無法走到最後。今次MV更專程遠赴日本取景，穿梭多個大眾熟悉的經典日劇場景，亦是Tiger繼主演《存酒人》後，再次與該劇導演盧煒麟（Alan）合作，細膩帶出歌曲中男主角的無奈心聲。
邱傲然《新歌》與天衡朱凱鋒聯手
對於再次與天衡攜手合作，Tiger直言十分幸福：「我哋私底下一早就好有默契，所以合作過程好快就捉到彼此嘅節奏。佢好清楚我歌聲嘅Range同埋唱得最舒服嘅位置，令成個Project執行得非常順暢。」提到今次歌曲風格的由來，Tiger透露並非刻意設定目標，笑說：「真係純粹大家喺創意上嘅互相碰撞，從而擦出咗呢個火花，自己都好喜歡呢個作品。」
邱傲然與天衡再合作感幸福
為呈現最佳視覺效果，今次MV找來了《存酒人》導演Alan團隊負責操刀。因為在拍攝電視劇時累積的深厚默契，而揀選在日本東京拍攝，Tiger覺得是因當地的色彩與風景優美，非常有利於鏡頭呈現：「今次真係機緣巧合，傾傾下大家覺得不如即興去東京拍攝。可以再同Alan合作，我覺得好安心又高興，希望陸續會有更多好作品呈現畀大家。」
邱傲然再與盧煒麟合作好安心
MV講述男女主角都是電影迷，特別到訪多個經典場景致敬，情節帶着淡淡的唏噓，男主角更隱約有種希望假戲真做、藉此表達對女方好感的微妙情感。被問到究竟造訪了哪些日劇場景？Tiger大賣關子：「我哋團隊有個共識，好想將呢個小小嘅任務交畀觀眾，睇下大家認唔認得出邊個場景，歡迎一齊討論！如果講到對我影響最深嘅日劇，真係《悠長假期》，近期我再重溫，無論係演員、音樂定畫面都咁吸引，男主角真係好有型。」
邱傲然MV向經典日劇致敬
不過遠赴海外取景難免遇到挑戰，拍攝團隊在抵達東京首日便碰上當地颱風，Tiger憶述：「我哋抵達第一日就撞正東京打風，攞車之後發現所有高速公路封晒，鐵路亦都停駛。好彩第一日無排拍攝行程，雖然去唔到原本嘅目的地，但最後都順利搵到地方安頓避風，唔使喺機場過夜，算係不幸中之大幸！」此外，語言亦是另一大考驗，Tiger笑言：「語言限制令溝通有少少難度，簡單如去便利店買件雞肉都有挑戰性！好彩今次嘅女主角日文非常流利，幫我哋解決咗好多拍攝上面嘅煩惱。」
>>>星島網WhatsApp爆料熱線(416)6775679，爆料一經錄用，薄酬致意。
>>>立即瀏覽【生活百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
