愛之深責之切 為拯救港股盡一分綿力 為港股獻計 | 莫灝楠

港股：本地股企得住，ATM拖死大市

先講大市。恆指年初至今 -5.8%，國指 -9.4%，科指 -23.7%。恆生35 +12.8%，係四個之中唯一正數。

主犯係ATM。阿里（9988）-26.4%，騰訊（0700）-29.9%，美團（3690）-31.8%。三隻都係恆指、國指重磅股，科指跌咗兩成幾，大市點都企唔住。

本地股有錢入，所以本地股指數——恆生35 YTD都係升嘅。滙豐（0005）+24.5%，渣打（2888）+23.8%，中銀香港（2388）+29.9%，創科（669）+45.9%。地產股方面，新地（0016）+12.9%，長實（1113）+15.3%，領展（0823）+6.1%。

要老實講，唔係國際金融股齊齊升。友邦（1299）-13.9%，港交所（0388）-7.3%，恒地（0012）都 -8.0%。真正撐場嘅係銀行股，唔係成個金融板塊。

點解銀行跑贏？銀行息差跟全球利率走，部分收入喺香港以外，同內地平台經濟關係細。

國際市場：成個世界都喺炒算力、炒晶片

韓國靠兩隻記憶體股。KOSPI +61.5%，SK海力士 +164.7%，三星 +123.9%。三星市值大約1,763萬億韓圜，海力士大約1,225萬億，兩隻股升得遠快過指數，帶動作用好明顯。

台灣同日本係成條電子產業鏈重估。台積電 +66.8%。日本方面，愛德萬 +110.3%，東京電子 +82.1%，Disco +27.4%。測試同設備股都升，唔係得一兩隻。

歐洲一般般。富時100，DAX 單位數升幅。

中港墊底。上證 -3.2%，恆指 -5.8%，包尾。

用各地科技指數比較下

排名一睇就明。韓國半導體 +139.0%，台灣科技 +83.2%，日本電器精密 +42.3%，美國XLK +40.8%，納指100 +23.7%，科創50 +14.0%，TecDAX +13.2%。港科指 -23.7%，係唯一一個負數。

原因係成份唔同。其他地方嘅科技指數以晶片同硬件為主；恒生科技指數就以互聯網平台、電商同本地生活為主，ATM就係例子。

今年資金追AI硬件，平台股食唔到呢一波。內地消費疲弱、平台之間捲得激烈，港股權重股嘅基本面，十隻有九隻有暗病，科指自然要跑輸。

Casper總結

基本上港股今年前三季度，係全面跑輸。同樣係花錢買算力，美股七雄越洗錢越升，ATMXJ越洗錢越跌，拖累指數。選對戰場好重要，就算你係呂布再世，幫曹操打赤壁都係要輸，整定。

中國AI龍頭monetize唔到，洗唔起錢，自然下面啲半導體、PCB、networking、SaaS就無盈利增長。入到國際AI產業鏈嘅公司數目有限，所以升黎升去都係嗰幾間公司，唔關ATM事。

適逢我地又無北水，而家美股一隻SanDisk嘅成交都幾乎等於港股成個成交。無成交，個個雞金經理、Trader，You eye look me eye，都落唔到手，咁就轉場，換美金換Yen￥。

狗講兩句，現時拯救恆生指數絕招：

1. 指數公司班友醒少少

2. 執過恆生指數計法同成分股

3. 恆生指數二合一（最有效方法）

不喜勿插，Sorli for 1999

元宇證券基金經理

莫灝楠