湯怡否認冇戲拍兼職美容 解釋朋友叫投資親自了解潛力：驚整污糟套衫換制服
日前有網民於社交平台貼出湯怡身穿美容師制服，與同事在拉麵店門口排隊，似是低調進軍美容界。昨晚湯怡與陳家樂一起出席電影《拾荒法師》首映，家樂也忍不住八卦問湯怡此事，湯怡就解釋當日只是上朋友公司，問到為何要着制服？湯怡表示因朋友叫她投資，但自己在這方面完全不認識，而作為女仔也相信每個女仔也想扮靚，認為這方面好有潛力，所以想先了解，對於家樂指不明白她為何要穿制服？湯怡說：「我驚整污糟自己套衫，因為我去成日，唔知會揩到啲乜，（唔係去兼職？）唔係！（係咪冇戲拍？）有，呢套（《拾荒法師》）咪上緊，啱啱我都客串完賀歲片。（即係你係第一日上去？）係唯一一日，我最近都好忙要搬餅房，所以嗰日係唯一一日落咗去睇一睇，跟住就俾人影到。」
湯怡強調演員才是正職
對於網民讚她貼地，她則笑言因為正忙於搬餅房，自己也會着制服，可能在工業區也會見到她着制服去食嘢，至於了解後是否有打算投資？她就指需要再了解多點，因為一日看不到太多：「譬如做餅，我自己都會認識嗰樣嘢，同埋自己做咗好多年我先至考慮，所以再要觀察多啲先。」問她是否打算專心從商？湯怡指那些只是副業，演員才是正職。
陳家樂湯怡兩年冇見默契依舊
家樂與湯怡在電影中飾演情侶，家樂指拍攝前兩人接近兩年沒見，因湯怡剛生完BB之後要照顧小朋友，之後就到自己照顧小朋友，問到兩人合作是否有生疏？家樂就表示沒有，兩人在演戲上很快就有默契，就算有嘈交或親密對白的戲，導演也很放手，讓他們自己去排。提到湯怡在戲中大聲鬧家樂，她就笑言家樂指她是做回自己，因為自己不笑的時候也被指是黑口黑面，戲中剛巧也是這樣，再加上說話的語氣也比較倔，所以跟自己也有幾分相似。
陳家樂出新歌驚到瞓唔着
另外，提到家樂最近推出新歌，他指已暗示了年多出歌，而出歌這個想法也醞釀了3年以上，又表示上次新歌發佈驚到瞓唔着及腦海一片空白：「我成日都覺得自己幾廿歲，乜都唔驚，但原來真係會驚到成個人好凍，（連詩雅有冇攬住你？）第一個發現我有問題係洪卓立，因為第一次要喺個台上唱歌，所以我都要好多謝太太同埋洪卓立，喺前一日綵排嘅時候已經俾咗好多意見我。」至於錄歌前是否有問太太意見？他表示沒有，但太太也有俾很多意見，雖然所有事都是啱，但始終太太不是監製或是歌唱老師，所以自己也不是太明白問題所在，最後要請教唱歌老師，笑指他對太太說的話聽不入耳，家樂即發揮「人夫求生本能」說：「聽唔入耳係因為我領悟力差，老師用咗好多方法去講我先明我嘅問題。」
陳家樂女兒聽新歌冇反應
至於是否有讓女兒聽他的新歌？家樂指有，但女兒沒有反應，因女兒年紀細不明白自己的歌想講什麼，自己的新歌主要是想多謝那麼多年幫過自己的人，至於之後會否再出歌多謝太太？他指出歌的想法在婚前，當時同事強烈建議他送給太太：「但我諗咗一日，我做唔到太肉麻嘅嘢，我寫唔到出嚟，將來可能得，但我話呢一刻未得住，因為嗰陣差唔多結婚，我要邀請人嚟我嘅婚禮，所以就諗起好多曾經幫過我嘅人，將來都會寫俾太太嘅！」至於他與太太都有唱歌，問到是否怕女兒日後只讚太太？他指讚太太是必須的，也很合理，但如果可以讚埋自己會很好，但不會強求：「咁梗係要自少培養佢嘅音準，佢聽得多好嘢先至會好，如果我唱得多俾佢聽，可能我唔係太好，佢嘅審美咪差囉，我OK，但職業級嘅梗係陳太啦！」
>>>星島網WhatsApp爆料熱線(416)6775679，爆料一經錄用，薄酬致意。
>>>立即瀏覽【生活百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
