邱彥筒新歌出爐揸男友長車拍MV驚到震 大媽Look笑爆全場

女團COLLAR成員邱彥筒（Marf），昨日推出年度第三支個人單曲《五時花 六時變》，歌曲以雙子座特質為題，為完美演繹出雙子座善變的個性，Marf在MV中以多個不同造型上陣，更打破一貫的型格形象，鮮有以喜感造型示人，在MV中發放笑彈。

邱彥筒邀黃偉文填詞

今次新歌由黃偉文（Wyman）填詞，從歌名不難想像內容，就連Marf也笑說：「同事們聽到呢首歌都十分開心，佢哋話『冇錯，就係你嚟！』」Marf透露這首歌由來很有趣，「邀請咗Wyman填詞之後，我寫咗一堆message畀佢，想按佢嘅心情揀選合適題材，最後，佢話呢首歌作詞人係雙子座，寫畀雙子座嘅歌手，話將呢首歌送畀我。我覺得都幾有意義，於是專登搵埋今次MV導演，佢都係雙子座，就好似全部都係雙子座去做今次件事咁，大家最明白大家嘅心意。」

Marf新歌出爐揸男友長車拍MV。

Marf以喜感嘅大媽造型示人。

Marf打破一貫型格形象，在MV中發放笑彈。

五時花六時變，亦是Marf性格特質之一。

在MV中揸車，對Marf來說是最大挑戰。

邱彥筒認現實中五時花六時變

作為雙子座的Marf，未知現實中又是否五時花六時變？她謂：「我係五時花六時變嘅，喺決定前一刻仲有得郁嘅時候，個腦都不停咁變，但出咗嚟工作後，會睇大局多啲，但內裏個心都郁來郁去。」

邱彥筒MV多造型上陣

為演繹雙子座鍾意變的特質，MV中Marf以多個造型上陣，「今次MV主要講雙子座喺應對意外時，個腦有好多dramatic幻想，所以會有唔同嘅look，代表唔同嘅性格人設，其中一個喜感嘅大媽look，就係代表要照顧人。今次係咪要突破型格感覺？好多人會覺得呢個係Marf嘅面向，唔會估到我可以有幾咁極致，一個咁大媽嘅造型，呢個造型仲要顯現出母愛同關心人，真係好正，但其實今次MV會有好多面向，而呢個造型，我相信我到60歲都唔會着呢啲衫，所以好驚喜。」

邱彥筒首在MV揸車

至於今次MV最大挑戰？Marf坦言是揸車：「第一次喺MV入面揸車，但係架車係Locker（林家熙），我就好緊張，勁驚，始終揸人哋架車會特別緊張，仲要我本身係揸開細車，而呢架係長車，所以我好小心。」