《食神》「楊師傅」陳志成怒轟被周星馳侮辱 食未熄煙頭拍足6天僅收500元 尊嚴受盡踐踏當場拒收
周星馳電影《食神》中，在片中大喊「好好味呀」的「楊師傅」陳志成，近日接受《威哥會館》訪問，怒轟當年在片場慘被周星馳「糟質」的侮辱真相。陳志成坦言，在《食神》中拍得最痛苦又不開心的，莫過於被「食神」訓話、要「含住煙頭企喺角落頭」的一幕。陳志成語帶憤怒地回憶：「本來有預備假煙頭，但NG太多用晒，就叫人點煙食煙，結果有啲仲未熄，就塞落我個口度，你使唔使咁過份呀？拍戲之嘛大佬，唔係殺人，我都唔敢出聲，唔敢嗌痛，拍咗十幾Take。」
周星馳500元片酬塞未熜煙頭落演員口
陳志威與周星馳不歡而散，除了這一幕「口塞煙頭」外，其賣命演出5、6日的「回報」，最終負責財務的田啟文竟然只遞上500元酬勞，陳志成深感尊嚴受盡踐踏，當場拒簽：「我話田老闆，我拍咁多部戲，一日都唔係呢個價錢啦！佢話當我係工作人員，你咁糟質我唔好話當工作人員啦！500蚊我直情唔會簽收，你唔好畀我，你畀劇務拎去買汽水飲晒去，我當冇收過呢個錢。真煙頭係咁塞落口度，你話㷫唔㷫？我冇應承你做，我係嚟到現場你話拍我就拍，你唔好當我佈景板，我有對白，行規講對白要畀返足個數，你畀5嚿水我，要我簽名，你侮辱緊我呀！」他透露以前客串《五億探長雷洛傳》5組戲都收足2萬元，周星馳的500元片酬無疑是極大羞辱。
周星馳拍《食神》忽然換角
事實上，陳志成本身是副導演，跟周星馳的淵源始於1990 年《咖喱辣椒》。其後在《國產凌凌漆》劇組任副導演時，周星馳對他印象深刻，當時第二日開工更熱情相認。陳志成憶述當時情景：「佢突然大力拍我膊頭︰『大麻成，我記得係你喇！』之後午飯就叫埋我一齊食，唔使食飯盒。」 豈料去到《食神》，周星馳在前一天臨時要他頂替八両金演出「楊師傅」一角。
薛家燕原本演出另一個角色
對於周星馳拍戲拍足廿幾Take卻從不解釋要甚麼，陳志成直言：「拍足廿幾Take，冇講有咩要改進，就係不停拍，佢要你畀嘢佢，佢都唔知要咩。」 電影甚至連拍完的部分都可以大改，陳志成指出，片中薛家燕原本是飾演廟街算命師傅：「本來家燕姐做算命師傅，大致情節已拍完，係爭一啲近鏡要補，有日周星馳見到我拍就行開，但未拍完，我要趕住去第二部戲開工，冇跟到尾，最後入戲院睇，先知改由苑瓊丹演。」
周星馳親口指陳志成人工貴
這次的拍攝風波，最後令陳志成與周星馳未有再次合作，除了演員費，周星馳連他的副導演費亦曾嫌貴。陳志成表示：「周生走嚟同我講過一句說話︰『你收好貴喎！』我當時收3萬5千蚊，唔係好多，我返大陸拍電視劇，收5萬元，仲未計有津貼，仲有架車有司機畀我。」 為了保住尊嚴，陳志成在合約到期後直接離開劇組，現時陳志成早已轉行，經常陪伴老婆旅行，過著遠離片場壓力的安穩生活。
>>>星島網WhatsApp爆料熱線(416)6775679，爆料一經錄用，薄酬致意。
>>>立即瀏覽【生活百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
