梅啟明指梅媽仍有千萬身家 怒斥姪仔為錢「等天收」 未婚妻May May強調不是二奶
已故樂壇天后梅艷芳的母親覃美金（梅媽），於上月底離世，喪禮亦已低調舉行，長子梅啟明曾指要豪花150萬元幫梅媽風光大葬，在得知母親已被火化後，接受訪問時越講越激動，引致身體不適，搞到要call白車送院。已出院的梅啟明與泰籍未婚妻May May日前一起接受《星島頭條》訪問，提到身體狀況，他先咳了一聲表示仍未恢復，醫生指他是過勞，又表示從梅媽離世至今，每日只睡個多小時，而提到姪仔，他更越講越勞氣，指對方當他冇到。
梅啟明鬧姪仔無良心
梅啟明又謂自己的律師有要求姪仔律師交出遺囑，但過了兩星期對方也未交出：「你既然話有，係咪第一時間交出嚟？點解到現在都唔交？係咪有問題啊？即係阿梅嘅版本啦，阿梅遺囑又係拖咗八個月，完全一模一樣，我覺得好奇怪。」提到他曾表示要告對方謀殺，梅啟明就指要先等對方交出遺囑，才知道之後如何做：「阿媽百年歸老，要佢安息、入土為安，呢樣嘢係我哋中國人要做嘅嘢，佢一把火就燒咗，呢個人真係冇良心不特止，鐵石心腸！」又指梅媽和梅艷芳是怕火，梅媽也講過如果是死一定不能火葬。
梅啟明指與梅媽脫離關係是姪仔操縱
至於他曾講過用150萬為梅媽風光大葬，而現在梅媽喪禮已完成，問他打算如何處理？他就表示循法律途徑，希望真的找到線索，又指姪仔太可惡和陰險，要「等個天嚟收佢」，又表示對方一直在部署，想梅媽快點死，「一日阿媽唔死佢一日攞唔到啲錢走，就係咁簡單。」問到梅媽有多少身家？他說：「如果正常計，超過1000萬，（但梅媽之前因打官司搞到破產。）打官司還打官司，破產由基金嗰度俾，我唔係話想錢嘅問題，而係一個老人家養咗隻狗，不但止咬你，仲要連骨都吞埋你，將你消滅埋，呢啲咩所為？」而他又質疑與梅媽當初脫離關係，覺得是姪仔在背後操縱，更激動到拍枱：「我對住燈火講，冇半句反話，講句難聽啲，肉隨砧板上，一個成百歲老人家，你控制住佢要佢做乜做乜，佢心中有數，我喺阿媽條腸出嚟我唔知佢諗乜做乜咩？但佢（姪仔）唔係，佢係深謀遠慮，叫佢都唔睬，呢啲咩人嚟？簡直係畜生！大家幫我做一個公證，同還我一個公道！」
梅啟明稱梅媽有報夢
問到梅媽最近是否有報夢給他？他指梅媽死得冤枉：「佢最怕火，你燒到佢咁，講句難聽啲佢瞇埋眼都要趷起身，佢報夢俾我聽就係咁，呢啲嘢信其有不信其冇，針唔拮到你哋唔會痛，（再大力拍枱）我個冤屈廿幾年喺度，冇一個人幫我不特止，仲要威逼我抹黑我，將我倒轉嚟，咩世界呀而家？如果我要靠阿妹啲錢就唔使今時今日啦…你哋一味話我貪錢，我貪咩錢？我有骨氣㗎！我12歲出嚟做嘢做到而家未停過，你哋日日話我攤隻手問阿媽攞錢，咁X街嘅！呢個潘小文唔知喺邊度派嚟嘅黑手，我見到佢，如果喺我面前我唔打佢我跟你挽鞋！」
梅啟明初識已口花花兼手多
至於梅啟明未婚妻May May受訪時表示初相識時梅啟明已口花花和手多，在過馬路及坐車時捉自己的手，覺得對方是一個很花心的男人，但看到對方的手腳瘀晒覺得心痛，覺得這個男人很慘，最初兩人也只是朋友般傾偈，慢慢就有感情，至於日後兩人若結婚，會否怕梅啟明再去追第二個？May May笑說：「佢老喇，唔驚呀！」又謂不會讓其他人欺負梅啟明，就算要養他也沒問題：「佢冇嘢特別值得我欣賞，佢個人好直好真又坦白，我就係鍾意佢呢樣嘢，我唔鍾意花心男人，我鍾意男人成熟啲，（佢口花花！）而家冇，冇力喇！」
梅啟明未婚妻獲梅媽送玉鈪
對於介入梅啟明的婚姻，May May坦言不覺得自己是二奶：「梅啟明同梅媽破產，Joey先嗌交返馬來西亞住，我冇出現過，佢破咗產先認識我。」她指離婚這件事要等梅啟明去解決。May May又表示梅啟明一直有工作，而梅媽曾叮囑她要睇實兒子，自己與梅啟明訂婚時，梅媽更買了手上的玉鈪給她，當時也有在家中燒香拜神，也有斟茶給梅媽，梅媽也很開心。
現時在中餐廳上班的May May表示是自己叫梅啟明停工，因為梅媽離世後他每天要東奔西跑，不能經常請假，所以叫他先休息，又指自己收到梅媽離世消息時正在返工：「嚇死我，跟住佢（梅啟明）打嚟話即刻去醫院見佢（梅媽），佢好硬頸，唔見我哋四年，所以我同阿媽講我日日都返工照顧佢個仔，叫佢唔使擔心，等佢安心啲。」
>>>星島網WhatsApp爆料熱線(416)6775679，爆料一經錄用，薄酬致意。
>>>立即瀏覽【生活百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
