時裝大師陳希寶60壽宴星光媲美頒獎禮 陳寶珠罕現身驚艷全場 黃子華搭膊祝賀極面子

著名時裝設計師陳希寶（George）日前迎來60歲大壽，向來在圈中人緣極佳的陳希寶舉行生日派對，當晚有份出席的嘉賓個個份量十足，星級陣容媲美頒獎禮。有份出席的黎燕珊貼上派對的相片並說：「非常榮幸獲邀請出席George陳希寶、Kenneth陳華國 生日晚宴，祝乖仔George生日快樂，身體健康。」

相中所見，最令網民震驚是近年極少公開露面、神龍見首不見尾的「子華神」黃子華罕有現身！相中見子華神精神奕奕，同壽星公搭晒膊頭合照，真係畀足面子！其他賓客陣容鼎盛，包括有陳慧嫻、許志安、鄺美雲、古巨基、陳寶珠、草蜢、關智斌、梁漢文和蔡卓妍等等。

陳希寶（George）與著名服裝設計師陳華國（Kenneth Chan）是神級拍擋，在圈中人緣極廣，過往為不少天王天后及舞台劇打造經典造型。陳華國多年來為無數樂壇巨星如梅艷芳、張國榮、羅文等設計過無數驚艷舞台的演唱會戰衣，而George 則憑着極高美學品味同精湛手藝，與陳華國攜手打造無數經典造型。陳希寶在2023年首度初踏台板，參演由陳培甡導演、改編自曹禺經典作品的舞台劇《雷雨》，在劇中挑戰自我，飾演 17 歲的少年周衝。其表現獲得好友容祖兒大讚帶來「驚喜亮點」，該劇隨後亦在 2024 年及 2025 年數度在香港載譽重演。 在2025年，陳希寶隨《雷雨》劇組出席《第四屆中國表演藝術獎》頒獎禮。該劇在典禮中雙喜臨門奪得「全國十佳話劇表演獎」，身兼導演、男主角及出品人的陳培甡更喜上加喜，獲得「中國表演藝術最佳導演獎」。

陳華國曾榮獲「大中華十大傑出設計師」及「香港十大傑出設計師」，自1984年投身娛樂圈以來，曾參與製作了超過500多個演唱會，親手為逾200位巨星量身打造舞台戰衣。從永遠的傳奇張國榮、一代玉女掌門人周慧敏，到當紅人氣偶像Anson Lo盧瀚霆在 MIRROR演唱會上的超震撼閃石戰袍，全部都是出自陳華國的手筆。陳華國亦曾為胞兄陳培甡與汪明荃合作的粵劇《李後主》及《紫釵記》，設計了極盡奢華、閃爆全場的手工水晶戲服，將傳統粵劇美學推上國際時尚殿堂。陳華國曾在訪問上表示第一個擔任形象設計的演唱會是蔡楓華，而最花心思的是為羅文的演唱會：「嗰陣時羅文形象已經定咗係咁樣，即係好華麗啊、好妖艷啊咁，我同張叔平一齊合作，佢做Art Director，我做Designer。我哋兩個商量，我哋覺得，其實不如將羅文改咗一個新嘅形象，配合返，因為阿叔個台好得意，佢成個台係木板嚟嘅，好粗壯嘅木板。我諗緊，點樣去配合返你個木板台呢？咁諗緊，係咪用啲紙啊、膠啊，呢啲文具，點知羅文第一個反應唔鍾意囉，咁我跟住我就解釋俾佢聽，我話其實呢，我哋今次好想塑造一個新嘅Roman出嚟，就唔想好似以前咁。你自己話要新穎。講完一大輪之後，佢臨尾呢，就夜晚12點幾鐘打俾我，佢話，『唉，我知你好錫我嘅你哋，好啦好啦，我同意啦！』。」