Lokman回應《星島頭條》親證劉德華投資《關於那隻龜回魂的故事》電影版 盼感受賀歲檔謝票氣氛
《星島頭條》獨家報道劉德華因看罷舞台劇《關於那隻龜回魂的故事》對劇本深受觸動，遂拍板投資，將這套舞台劇搬上大銀幕。電影版由劉德華親自監製、邱禮濤執導，並落實於11月開拍，強勢進軍2027年賀歲檔，而電影版亦會由阮小儀、楊樂文（Lokman@MIRROR）、梁仲恆、王耀祖、胡麗英及阮韻珊等參演。
Lokman未收到劇本
對於《關於那隻龜回魂的故事》開拍電影版，Lokman受訪時直認不諱，坦言在做舞台劇期間已聽到消息，知道監製和編劇一直和劉德華方面有聯絡，商議如何去做，但因一切未非常確實，故打算待進展多點才跟大家講：「諗住再行多幾步先，確實少少先至同大家公佈咁樣，（而家行咗幾多步？）起碼大家都知道，劉生佢哋投資啦，然後邱導做導演，編劇應該就係 Melody（阮韻珊），我都唔知可唔可以講咁多…我都講埋啦，應該係希望同舞台劇原班人馬一齊演，我就知咁多咋。」不過他表示未收到劇本，相信這些詳細的事情還在處理中，自己也不擔心，因為知道他們一直為此事進行溝通和創作。
Lokman預留檔期拍電影
至於聽到舞台劇會變電影版，大家是否感到興奮？Lokman坦言興奮，但最初也會擔心，如何將舞台劇搬上電影：「有陣時劇本會唔一樣，演繹方法都會唔同，我哋喺舞台有時會容易處理，就係我哋全部都屋企景，咁就都容易接受啲，但電影全部都屋企景，或唔係全部都屋企景，咁要加啲乜嘢落去？大家就喺度諗緊呢啲。」至於是否將在11月開拍，Lokman直言不知道，因仍未落實是10月底還是11月，自己還在等待，但已預留了檔期給他們，提到那時候Lokman也要應付自己的工作之餘也有MIRROR演唱會，他指工作方面應該是演唱會和《關於那隻龜回魂的故事》電影版最主要，要看到時如何配合，至於到時劉德華是否也會在電影中客串？Lokman就不知道：「但你問我想唔想，想嘅，難得有得合作下！未試過同佢一齊做嘢，見面就見過，有時去佢製作嘅舞台劇，見到面會傾偈。」對於首次演賀歲檔電影，Lokman笑言想感受一下新年檔期去謝票的氣氛和心情：「可能大家都開心啲，間唔中攝幾封利是過嚟。」
>>>星島網WhatsApp爆料熱線(416)6775679，爆料一經錄用，薄酬致意。
>>>立即瀏覽【生活百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
