烈酒去庫存長路漫漫 啤酒防守有餘進取不足 | 莫灝楠

烈酒「高端化」神話破滅

過去幾年烈酒巨頭（Diageo、Pernod Ricard）吹捧嘅「飲得更好、飲得更貴（Premiumization）」，隨住疫情後居家囤酒潮退卻同通脹夾擊，而家正式現形。歐美同中國經銷商成屋都係存貨，商務宴請縮皮，高年份威士忌同干邑根本去唔到貨。Diageo 搞到要裁員千九人、三年死慳十億美元去頂住個 Operating Margin；保樂力加被逼轉身推龍舌蘭同罐裝調酒。

連茅台都要靠「i茅台」直銷調轉搶番渠道利潤，搞死曬啲經銷商。再推系列酒補翻條數。

大眾啤酒防守力強

啤酒市場，勝在夠貼地、夠剛需。就算經濟幾差、失業減人工，打工仔收工飲罐平啤酒嘅錢點都仲有。百威英博、喜力同嘉士伯呢類龍頭，增長當然有限公司，但中單位數字銷售增長都通常做到嘅。

無酒精啤酒好賺：無酒精啤酒稅率低一截，部分市場甚至免稅。但零售價同普通啤酒差唔多，毛利率高。當然，始終唔係酒，銷量佔比唔多。

抗通脹能力過硬：單價低又有 B2B 數碼訂貨系統同新興市場（拉美、東南亞）撐住，防守性好過烈酒。

Gen Z飲酒轉向，純飲烈酒不再是潮物

年輕一代並唔係滴酒不沾，而係唔想飲到斷片同宿醉。而家出街聚會，少左 High-end 干邑 / 威士忌純飲。年輕人要嘅係輕負擔——低度調酒、Highball、Mocktail。消費習慣嘅改變，直接導致傳統烈酒產品升級效應降低。

RTD純粹係頂住先

好多酒企同投資者講即飲預調酒（RTD）係新增長亮點，但計下數就知呢個係美麗誤會。RTD 本質係快消品，鋁罐包裝、重型物流加渠道推廣，成本高，單箱毛利同幾千蚊一枝嘅高端瓶裝烈酒冇得比。賣多幾萬罐 RTD，營收數字可能好睇少少，但實際上反而稀釋緊整體營業利潤率。酒企暫時只能講係用緊薄利產品去頂住整枝烈酒銷售倒退嘅缺口，並不是新增長點。

買啤酒防守，烈酒業績未得

作為投資者，要分清「穩陣防守」同「價值陷阱」：

啤酒股確定性高： 剛需穩、無酒精啤酒毛利高，現階段穩陣收息兼防守，防守力夠但無高增長。

烈酒等見底訊號： 歐美烈酒巨頭仲處於裁員、去庫存嘅陣痛期，中國白酒亦要睇商務需求同批價幾時企穩。