試真D唷丨首播前搶先突襲TVB飯堂 江美儀吳業坤張振朗揭3大隱藏名物 王牌雞髀冇得輸
TVB綜藝節目《試真D唷》今晚（9月6日）起，一共10集逢星期日晚上8點翡翠台播出，新一輯主持陣容除了江美儀、朱敏瀚和吳業坤等人外，還有視帝張振朗加盟。首集江美儀聯同吳業坤及張振朗將會踏足高雄挑戰3大Item，先有「小強出沒注意」的劣評如潮平價燒肉老店，再嚟有「銅板美食」之光、有「飯糰界A380」的超足料珍寶飯糰，以及網絡評價低至1.7分的「超雷」海鮮熱炒店。
江美儀拍片介紹三大星級隱藏名物
日前江美儀、吳業坤和張振朗出動探店，今次去了香港最具神秘感卻又在電視上曝光率極高的飯堂之一——TVB Canteen。因電視城出入必須持有員工證、藝員證或訪客通行證才能入內，不少藝人都曾拍片大力推薦其平民經典美食。今次江美儀等人拍片介紹三大星級隱藏名物，解構這間「開工時你唔想食都必須要食」的傳奇餐廳。
江美儀吳業坤張振朗去TVB Canteen試食
江美儀與吳業坤和張振朗等去了TVB Canteen試食下午茶，江美儀笑說：「呢間餐廳最特別嘅地方，就係你想入但入唔到嚟嘅，但你必須要食，你唔想食但必須要食呢間餐廳。」在點餐櫃檯前，收銀姐姐介紹必試美食，一開口極力推薦隱藏菜單扒芝腿治，接着江美儀一口氣叫了多款下午茶：「有燒賣、熱狗、雞髀，同埋嗰個扒芝腿蛋治、西多士、魚蛋，同埋炸雲吞，本人呢覺得個炸雲吞係冇得頂嘅，因為我已經食咗一粒。」另一樣勾起無限回憶的就是餐廳的王牌雞髀，張振朗對這隻雞髀可謂情有獨鍾：「嗰陣拍《機場特警》，又要好乾身、好fit㗎嘛。食包有澱粉質又怕肥，所以我每一次上嚟，我唔知晏晝呀，放lunch已經會講，可唔可以留定兩隻雞髀畀我，我放宵夜嘅時候呢，我一定要食㗎。跟住之後我同啲同組藝人，佢哋問點解冇晒雞髀嘅？跟住話梗係畀張振朗留起咗啦！」
張振朗彈TVB舊Canteen好差
經過一輪「狂風掃落葉」後，大家很快「清枱」，江美儀：「順帶一提，我哋平時開飯啲嘢都係Canteen。」吳業坤賣花讚花香指感覺很溫暖，令他有家的感覺。張振朗就說：「其實以前未有嗰啲外賣嗌嘅時候，淨係可以食Canteen，我記得之前係一間唔係呢一個老闆係另一間，我食過一次真係好差，最後搞唔掂，真係要馬老闆佢哋返嚟，一回歸其實我覺得啲嘢食係OK。」雖然有指上一手是大財團，但他們懶理繼續講：「我覺得喺TVB Canteen食嘢，唔係淨係食個食物味道，好多時就係見到啲同事坐低飲杯茶吹兩句水，有時馬老闆又會出嚟打個招呼，好似讀書嘅時候嘅小食部，同埋我哋真係救命嘅，出外景之前買個三文治又或者買個燒味飯喺車度食，呢個係我哋嘅回憶。」
馬老闆在圈中出名人情味濃
而他們口中的「馬老闆」，正是自1983年起在TVB員工餐廳服務超過40年，由廣播道、清水灣搬遷至將軍澳電視廣播城的馬慶豪。馬老闆在圈中出了名人情味濃厚，不少藝人在新人時期經濟拮据都曾向他「賒數」食飯。在《萬千星輝頒獎典禮2021》馬慶豪獲頒「專業精神獎」，當時張衛健曾公開表示，自己剛出道、過得最艱難的時候，全靠馬老闆讓他賒帳才得以溫飽，因此視馬老闆為終身大恩人。「豹哥」單立文亦曾在台上大彈舊餐廳的「食物質素」：「你睇成個餐牌都係差唔多，我記得有一排每樣汁都係一樣味，每樣餸都係同一道味，如果擺入口咬完之後都唔知係咩肉。啲肉就會令你覺得究竟係家禽定係飛禽係咩呢？估唔到？」
>>>星島網WhatsApp爆料熱線(416)6775679，爆料一經錄用，薄酬致意。
>>>立即瀏覽【生活百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
