《中聲4》蒙面動物歌手9．30開騷 劉佩玥羅天宇周志康黃建東犧牲睡眠排練

以蒙面身份，動物造型參與《中年好聲音4》的「企鵝人」周志康、「獅子王」羅天宇、「貓女郎」劉佩玥、「白羊君」姚兵、「白眉鷹王」莫家淦、「樹熊公子」黃建東早前宣布將於9月30日晚上8時正，在麥花臣場館舉辦《愛爆動物音樂秀》，票價分別為$1380 (VIP，福利包括可觀看綵排及和6位歌手合照）、$980、$680，優先訂票經已全部售罄，明天在Cityline的公開發售。

周志康感動終可兌現開Show承諾

6位蒙面歌手在《中聲4》的表現均令大家眼前一亮，為樂迷帶來驚喜，獲得不少粉絲追捧支持，他們今次有機會站在另一個更大的舞台上再度發揮自我，讓大家更加認識他們對音樂的堅持和努力。周志康表示非常開心《愛爆動物音樂秀》的出現，「因為經歷咗整整差唔多一年嘅比賽，途中有唔少fans問幾時會開show，終於可以俾個日期佢哋。見到我哋今次音樂會動物歌手嘅陣容，亦都令我諗返起當初大家參加呢個比賽嘅第一日，大家戰戰兢兢好俾心機去練歌，各自為自己嘅舞台努力。今次大家可以再為屬於大家嘅音樂會共同努力，有另一種意義；加上其他5位都係自己嘅好朋友，所以好期待今次音樂會。我希望唱多啲好歌俾大家聽，回饋返呢段時間一直支持我嘅歌迷。」

《中聲4》蒙面動物歌手9．30在麥花臣場館開騷。

6人再並肩作戰。 ​

《愛爆動物音樂秀》明天在Cityline的公開發售。

姚兵期待同大家見面。

姚兵興奮相隔十多年再獲舞台肯定。

莫家淦能跟大家分享音樂，已經係好大嘅福氣。

莫家淦從未放下歌手夢。

周志康感動終可兌現開Show承諾。

「企鵝人」周志康 。

「獅子王」羅天宇 。

羅天宇珍惜演出機會。

「樹熊公子」黃建東 。

黃建東盼彈琴唱歌展現不一樣的自己。

「貓女郎」劉佩玥。

劉佩玥感恩劇迷認識到歌手身份。

羅天宇珍惜機會

羅天宇好開心有一個屬於他們動物歌手的機會，「其實係參加比賽嘅過程中，我哋基本上係冇以一個組合形式去代表動物歌手唱歌，所以真係好期待可以一齊大合唱。另外如果唔係公司俾咗我哋參加《中聲4》嘅機會，我相信自己都冇機會可以成為呢個音樂會嘅其中一份子，再加上自己喺24強止步，一直都希望可以有更多機會再去唱歌俾大家聽，所以自己好珍惜嚟緊係音樂會所參與嘅每一部分。」

劉佩玥感恩劇迷認識到歌手身份

劉佩玥感謝大家一直以來對她的支持和鼓勵，「好感恩由大家喺我參演嘅劇集角色中認識我，到今次可以喺《中聲4》嘅舞台上再發現我唔同嘅一面。雖然比賽已經結束，但因為我好熱愛音樂，好鍾意唱歌，所以一直都繼續好努力咁去練歌同練琴，亦有學習音樂創作，當然唔少得一直要keep住身心嘅健康狀態、做運動無得臨急抱佛腳，要好自律同持之以恆，所以依家都keep住鍛鍊自己，唔單止為咗上台表演著衫好睇，而係將好嘅狀態一直keep住，咁就做咩都會更得心應手。」

姚兵興奮相隔十多年再獲舞台肯定

姚兵興奮說：「可以開音樂會係對我今次參加《中聲4》嘅一個肯定，我覺得呢個音樂會好特別，用動物園嘅概念同身份嚟參加，我記得上一次喺我身上有啲熱度出現就係《星夢傳奇》，但都已經係十幾年前嘅事，當時完咗比賽之後都冇特別舉辦音樂會，所以今次有呢個機會真係好開心，好期待同大家喺舞台上見面。」

莫家淦從未放下歌手夢

莫家淦表示自入行以來，一直渴望能夠得到更多唱歌的機會，「首先衷心多謝《中聲4》，給予我一個專屬歌唱嘅舞台。每個週日都可以企係台上唱歌，同大家分享音樂，已經係好大嘅福氣。令我更驚喜開心嘅係後續仲有一場《愛爆動物音樂秀》，呢個寶貴經歷，亦令我距離歌手呢個身份再邁進一大步。雖然我喺《中聲4》止步淘汰，但我從未放下做歌手嘅夢想。追夢之路唔會停低，往後我會繼續堅持，做屬於自己人生嘅主角。」

黃建東盼彈琴唱歌展現不一樣的自己

黃建東說：「其實由細到大都有彈琴同寫歌，音樂一直都係我嘅夢想，諗唔到因為參加《中聲4》有機會參加呢個音樂會，希望到時彈琴唱歌令到觀眾認識一個不一樣嘅黃建東。」周志康、羅天宇、劉佩玥、姚兵、莫家淦、黃建東異口同聲說寧願犧牲睡眠時間，也要把今次演出做到最好，希望大家能夠為他們在音樂會中所付出的每一分力而感動。