港珠澳半馬｜黃冠衡初戰港珠澳半馬 用表現打碎質疑 望奪金牌為本港首個白金標賽事更添意義
「中國銀行（香港）港珠澳大橋（香港段）半馬拉松2026」將於11月15日舉行，今屆賽事亦成為本港首個獲世界田徑聯會認可的「白金級道路賽事」，本地半馬好手黃冠衡周三受訪分享備戰狀況和轉為全職跑手的心路歷程，他亦希望可盡全力衝擊本地冠軍。
黃冠衡用努力突破天賦限制
比起一眾有天賦，由細跑到大的全職跑手，黃冠衡Ken的全職跑手之路卻不太一樣，他在中學時成績未算太突出，到近年成為全職運動員才開始嶄露頭角，繼上年奪得渣打馬拉松半馬亞軍，今年再奪季軍，成績亦正穩步上升。
然而在這個過程中Ken需要付出的可能要更多，例如放更多時間去練習和研究不同跑法，亦在過程中受到不少挫折，而Ken認為對比起一眾具天賦跑手，自己的努力也是一種天賦：「我覺得努力都係一種天賦嚟嘅，可以堅持到咁耐，同埋經歷咗好多次嘅失意，其實我跑十場比賽，做唔到目標嘅比賽一定多過做到目標嘅比賽。但經歷咗好多次呢啲經歷，都繼續堅持冇放棄，我覺得就係我嘅天賦。」
默默耕耘用成績打破質疑
而在全職路上Ken也遇到過不少困難和質疑，畢業於中文大學健康教育及體育科學系的他，表示由一開始就決定要成為全職運動員，當時也有不少人不解為什麼要做這個選擇，而不是更穩定的路，到成為教練也會被質疑太年輕，他也笑指：「因為通常大家對於一個教練嘅印象就係比較成熟穩重、有經驗。我成日都講一個比喻就係，我明嘅，就算我睇醫生我都想搵個做咗好多年、好有經驗嘅醫生睇。」
但面對種種質疑Ken則認為做實事就是最好的應對方法：「開頭係比較介意，剛開始係比較介意，會因為人哋講我嘅決定唔開心；但依家反而就冇乜，依家真係比較專注於自己，同埋努力做個成績出嚟畀人睇到。我覺得如果大家見到我個努力同成績，係會有目共睹嘅。」
提到自己一直的堅持，Ken也指出最重要的是對跑步的熱愛，一直用自己的努力和鑽研不同方法去提升也令他從過程中提高自信，另外作為港隊一分子和一名教練的責任，這些都是他一直堅持披星戴月、風雨無阻地跑步的原因。
港珠澳半馬升格有助提升本地長跑實力
而提到今屆港珠澳半馬升格為世界田聯認證的白金標賽事，Ken則認為對本地長跑發展和成績無疑是有幫助的：「平時要跑白金標可能要大費周章去另一個國家比賽。今次喺香港主場，有外國精英跑手嚟，我覺得除咗當日比賽氣氛會刺激到我同香港跑手做好成績之外，長遠嚟講風氣會推動到長跑嘅發展。」他也補充指：「多咗人過嚟比賽，我哋交流多咗、認識多咗，亦都畀我哋見識到香港隊跑手同世界嗰個差距係幾多。我覺得都係一個推動我哋去進步嘅動力。」
Ken表示一直也有訓練打好基礎 ，他早前已到雲南高原進行為期一個月的集訓鍛鍊有氧耐力，而提到今次的目標除了跑出PB，突破66分鐘的成績外，Ken也希望以奪冠為首屆香港白金標賽事增添意義：「今次比賽除咗 PB，都會想喺本地上做到高啲名次。因為始終係香港舉辦，而且第一次白金標，我覺得幾有象徵意義呢個比賽，所以我希望盡力攞一個本地嘅冠軍。」
記者/攝影：魏國謙
>>>星島網WhatsApp爆料熱線(416)6775679，爆料一經錄用，薄酬致意。
>>>立即瀏覽【生活百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
