投資前必須問——點解？｜曾智華

曾經意氣風發的前中國首富許家印終被判刑——無期徒刑。只是67歲，但如今已白髮蒼蒼，站在犯人欄內了無神彩聽宣判。

有冇值得丁點同情？零！你可知佢的所作所為，累死幾多人，幾多個家庭，以及禍及中國經濟？

昔日恒大發8至10厘債券

說來，被老許「騙」的一眾「猛人」也不值得同情，正是，食得鹹魚抵得渴。十年前，已有幾位身家上億及出任上市公司CEO朋友，不停開開心心「曬」話：「阿碌，真係唔使做嘞，因單單買恒大債券，已長期收8至10厘息，穩穩陣陣，真係正到呢……」

為免破壞朋友雅興，也不想「侮辱」佢哋智慧，凡聽到上述興奮宣言，我永遠堅守訪問前恒生銀行董事長利國偉的教誨——話到口中留半句。本來想問：「點解恒大會放出咁大隻蛤乸呢？若可以付3、4厘息向銀行借到錢，為乜要發8至10厘債券？唔合邏輯喎。」

以上說話，次次吞回肚裏，但就見一眾恒大債券迷買吓多啲，買吓又多啲，不少更動用家人積蓄及向銀行貸款瞓落去。結果？你知我知大家知，毋須細表了。中招者，包括有頭有面香港叻人，仍會如此中招，難怪散戶騙案，數字飛升了。

點解美國俾5厘幾息？

小弟的鐵律，經常與理財班學生分享——凡投資，見到不合理特筍的金融產品，必先問點解？若冇百分百信服理由，放棄好了。正是有放過冇殺錯。世上，並沒絕對安全又超過銀行定期息率的投資品，搞清楚！

同一情況，近日N咁多老友又問：「碌Sir，美國債券30年利息去到5厘多，應否瞓落去？」

我的回應也如是：「請問同是國債，點解美國俾5厘幾息而中國只有2厘？若未能解答到此問題，一定是魔鬼在細節，切勿將養老金押下！若真有安安穩穩5厘息投資，仲會有人辛辛苦苦搞生意？」

絕大部分人都會以為美國債券已發了多年，至今從未爆煲，冇事嘅，因佢Too Big To Fail。若真，全世界各國債券及定期存款，皆可收工了。我看，呢次真係信者無得救喇。

資深傳媒人 曾智華