古天樂演唱會丨汪明荃黑絲艷壓紅館 32年後世紀合體公開向古仔自薦：老闆，幾時有機會合作？
入行33年的古天樂首個個人紅館演唱會《MY FIRST SHOW》昨晚（22日）首場開鑼，獲不少圈中好友捧場，台上台下星光熠熠，全晚古仔不僅誠意十足連換11套戰衣，更化身「黑武士」揸激光劍空降舞台，尾聲竟迎來「核彈級」驚喜！一身PINK LADY造型的「阿姐」汪明荃黑絲艷壓登場，與古天樂重現32年前TVB台慶的經典伴舞一幕，瞬間引爆全場氣氛。
汪明荃向古天樂自薦合作拍戲
汪明荃和古天樂在台上又唱又跳《熱咖啡》，汪明荃笑言想不到獲邀做嘉賓：「我哋唔係好熟喎，點解你會搵我嚟做嘉賓？我真係諗唔到喎，你哋都諗唔到，係咪先？」古天樂則稱在30年多年前曾與汪明荃合跳並讚她認真，汪明荃爆笑說：「咁梗係要認真啦，係咪呀？你畀我機會喎，老闆！我好耐冇拍戲，老闆，有冇機會同你合作呀？」
汪明荃在台上忍不住問為何古天樂會開演唱會：「我真係想問下你，你做好多瓣㗎嘛，你又開製作公司啦，又拍緊電影啦，又搞舞台劇喎，咁今次就係第一次做演唱會，我真係唔明，你唔攰咩？呢啲嘢唔係你嗰瓣嚟㗎喎。」古天樂則說：「你講得好好，我哋喺呢個時間，面對好多困難，社會上嘅困境，係咩我就唔方便講，咁但係你問我呢，無論點樣都好，我哋一定要挑戰自己，不斷進步，唔可以問我呢一步行唔到就唔行喇，OK？」除了世紀同台，貼心的古天樂更為即將在8月28日生日的汪明荃準備了秘密驚喜，工作人員推出精緻的生日蛋糕，古天樂帶領全場逾萬名觀眾一齊合唱生日歌為阿姐預祝生日。汪明荃感動地表示今次非常難忘的一次演出，但同時也意猶未盡地向古天樂撒嬌說：「雖然唱嘅歌好少，我唔夠喉呀你知唔知呀？多謝晒，多謝。希望你順順利利啦，聽講澳門仲有喎，犀利喇，已經開始佢嘅唱歌事業喇！」
汪明荃和古天樂的演出片段在網上瘋傳，有人讚：「古天樂真係好有心，紅館開演唱會諗到要致敬返當年呢次表演。」亦有不少人讚汪明荃的PINK LADY配黑絲造型：「78歲對腳可以Keep到咁其實好勁！」：「咁多年對腳都仲keep得咁好。」、「以為會係天下一拼盤，點都估唔到係汪阿姐！」、「78歲咁表現真係好勁，一上台就好有精神咁，respect。」、「呢套衫仲靚過佢自己演唱會。」、「Liza forever diva!」、「79仲肯著高踭鞋，仲要穩陣，我28已經唔想著。」、「幾時都話家英哥好識食。」、「汪阿姐嘅出現係大驚喜，佢真係屬於舞台同埋演藝嘅！」
好拍檔宣萱今次亦有現身，兩人合唱《無時空之戀》，宣萱笑指已認識32年，古天樂是繼修哥胡楓之後，第二位年紀最大在紅館開show，古天樂聞言狠狠回一句：「你同我年紀差唔多，唔好玩嘢！」之後兩人介紹Tyson Yoshi出場，並一同合唱《紀念日》。古天樂請來昔日「華星之友」楊千嬅再度同框，兩人先合唱《野孩子》，難得合體自然要話當年，數數手指，大家先後合演過劇集《美味天王》、音樂特輯、電影《乾柴烈火》、《單身男女2》、《五個小孩的校長》等，合作無間，古仔還於2007年為對方的《all about Love 楊千嬅2007演唱會》任嘉賓，相隔多年後再於紅館延續這段緣份，兩人爆笑連場，現場還重溫兩人於1997年為華星25周年的勁歌熱舞片段，回憶滿滿。在一片熱烈氣氛下，楊千嬅在台上即興唱了幾句《今期流行》，並再唱自己的作品《勇》，贏盡掌聲。
為滿足四方八面的觀眾，演唱會特設360環節，古天樂登上「Kooloo號」，升到高處對住「山頂嘅朋友」翻唱多首「哥哥」張國榮名曲，包括《側面》、《不羈的風》、《想你》、《為你鍾情》，其後古天樂唱出《天命最高》一樣反應熱烈，唱罷的talk位，古天樂一度只能點頭未有發言，其後才緩緩說：「好多謝你哋咁多年嚟支持，第一次演唱會乜都唔識，可能做得唔好，但都值得。」台下有歌迷大叫：「唔好喊呀！」氣氛一轉，台上出現巨型吹仔Q版古天樂，經古天樂唱完《並肩同行》，大屏幕以Q版動畫重溫他入行以來的代表作及經典角色，尾聲終於大唱出道歌《男朋友》，場面感動。演唱會終極尾聲，DJ SimonGirl把紅館現場變成電音派對，古仔演繹快歌Medley，最後以《今期流行》作為壓軸，他走勻四面台大跳拜神舞，全場High爆之餘亦可謂誠意十足！
>>>星島網WhatsApp爆料熱線(416)6775679，爆料一經錄用，薄酬致意。
>>>立即瀏覽【生活百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
