認購銀債睇住嚟食｜曾智華

每年此時皆如是，總有最少幾十老友追住小弟問：「碌Sir，（一）你會否申請銀債！（二）會申請幾多？（三）今年值唔值得申請？（四）中電（002）等股票都有4厘利息，又有機會升值，會否比申請銀債更好？（五）應用幾錢申請，估計可以派到幾多手？

都幾好笑，銀債已推出多年，點解班老友仍然年年問，而問的，又是同一批問題？

肯定不單止小弟老友們如此，廣大讀者相信也有超過六、七成會年年繼續問。咁好啦，我就一年一度，徇眾要求再答啦。

絕少零風險又必賺的投資

（一）銀債乃政府變相派錢俾老友記，投資鐵律，凡有賺冇蝕的，無論賺多少，都要去馬！世上絕少零風險又必賺的投資，銀債正是，「有食唔食、罪大惡極」呀！

（二）銀債既是政府派錢，故必定不能批出太多，今次去盡550億。香港60歲以上人口年年增加，即年年合資格申請者也增加，如此，每人分派到的會一年比一年減少，除非政府加大發行額。今次保底息4.25厘，遠比存定期高，又冇風險，兼且保底後可能有機會向上調，故此，應將閒錢去盡！

（三）銀債年年都應申請，因與存定期比較，除利率更高外，隨時唔玩又冇損失，賣回俾政府已可。

（四）對，不少股票看似利息4厘或更高，但勿忘記，買賣股票要俾佣金印花外，最重要是股票存在貶值風險，你除非「新嚟」，應知不少股票可以唔聲唔聲跌一半。銀債絕冇這點擔心，買後可以內心安寧日日甜睡。

（五）應購幾多手最好？雖云每人上限認購100萬，但肯定蹝氣，因銀債分配，按認購人數多寡作決定。認購者越多，分配越少，數字公開，故絕不應傻吓傻吓掟100萬落去。申請幾多最精明？唔使急，等到9月頭才決定。

銀債9月4日下午截飛，大家可以9月3日下午睇睇幾多人入咗幾多手申請（中介金融機構會公開），再計計有機會中幾多手，然後落飛。我每年都準備30萬出擊，今次不例外，望中25至30手啦！

資深傳媒人 曾智華