周國賢借AI創作音樂嫌太完美 要還30首歌債未有時間再搞騷

周國賢（Endy）今日（14日）到新城電台宣傳新歌《仿生覺知》，以反思人工智能大行其道對人類的影響為題材，上月底於四場演唱會上首次獻唱，並大獲好評。周國賢受訪時表示，兩、三年前同朋友研究如何運用AI創作音樂，起初覺得新奇、功能眾多，使用簡單指令便能生成完整歌曲：「沉迷咗一段時間，後來發覺好似太完美、太鋒利，好聽到有啲刺耳！我哋想要返細個寫歌嘅瑕疵、個人味道，所以而家原始咁用返一支木結他去寫。首歌講緊內心掙扎，到底用唔用？係我用緊佢？定佢用緊我？」Endy表示不抗拒人工智能，但要保持小心。

周國賢自彈自唱重拾寫歌熱血

周國賢撰寫《仿生覺知》歌詞時，浮現「明天將會世界末日」之感，「我自己搞咗個末日派對，點蠟燭，用木結他自彈自唱歷年作品，由自己作嘅第一首歌，唱到到最近為止，嗰時都有啲情緒，有感動，流咗兩行眼淚，突然間好似充晒電，重拾二十年前寫歌的感覺！」上月底舉行演唱會時，周國賢指，同相識二十載的歌迷見面，就如老朋友一樣，「見證佢哋結婚生仔，經歷人生低潮，而家飛黃騰達，大家好似老朋友一樣聚會。（再辦演唱會？）交由公司決定啦！我欠人一身歌債，名單好長，要清咗啲作歌嘅債先。（欠多少歌？）冇三位數嘅，但二、三十首走唔甩！」

周國賢到新城電台宣傳新歌《仿生覺知》。

周國賢上月底舉行四場演唱會，首次唱《仿生覺知》。

周國賢曾經借助AI創作音樂，他嫌成品太完美。

新歌《仿生覺知》以反思人工智能大行其道對人類的影響為題材。

周國賢要還30首歌債，未有時間再搞騷。

周國賢朋友被某歌手騙財

談到近況，周國賢稱騙案頻生，有騙徒冒認某一位歌手向他的朋友行騙，指身體抱恙，要錢應急：「我朋友好好人、有義氣，諗都唔諗就過錢畀佢！之後查清楚，發覺個名唔同，就知道瀨嘢喇！點知過咗個禮拜，個『歌手』又搵返我朋友，話知道佢畀人呃，想去銀行幫手搞啲手續攞返錢，問我朋友攞銀行、個人資料，擺明係二次行騙！」他續說，今年網上出現有五個假社交媒體帳戶，笑指粉絲儲齊五張截圖，「我覺得可以有誠意啲，唔好咁求其擺張相，同埋我唔會用自己個名囉，會型啲，唔係就咁Endy！係粉絲都好醒目，唔會中招。」