唔好阻發夢王交學費｜曾智華

世界上，冇一樣專業技術是毋須慢慢磨練而可以一步登天的。齋講，人人都明。但一去到現實世界，介入了人類天性兩大盲門——貪婪及無知，咁就有七、八成人會突然「失智」。

要掌握一門技術，必遊之路為——參與、學習、跌倒、再學習、失敗、再學習……就此，在長時間中跌跌碰碰，再加上用腦用力專注去學習，才會有所成。跌跌碰碰的過程，廣東人術語叫——交學費。

所有成功生意人，必定失敗過。所有明星騎師，必墮過馬。所有天王球星，必曾重創。成功，全部要先交重學費，才能登頂。所以，若你毫無基本智慧又常識欠奉，就衝入一個領域，意圖獲取豐厚成果，那麼，你只是在做一個白日夢，唔失敗就奇。

投資領域，尤其多傻仔傻女，以為錢好易賺（近月南韓有數十萬！）。這種無知心態，正正周而復始長年累月被騙徒掌握，製造出一盤又一盤「好易賺」的生意，俾傻仔傻女參與，揚言唔使捱就每月有幾成利潤。簡單篤爆，就是龐氏騙局。

切忌臨晚年才去交學費

「橋」唔怕舊，永遠有人受，上周警方又起錨，將一間「Fun Coffee」公司的投資騙局踢爆，揭發200多宗騙案，最高被騙金額為963萬元。以前，當我見到身邊人胡亂投資飲食業，又或被游說參與甚麼必賺投資，都會苦口婆心作出分析，指出金融世界絕不乾淨美好，反之，全部盜匪如毛，踩入去必變水魚。

但不幸地，冇一次成功。因當佢哋全部對眼被「貪」字蒙蔽，又真心以為自己好醒，早看通全局，賺夠就會及時抽身……真的可以？但正如毛澤東名言——天要下雨娘要嫁，要發生的，總會發生，我根本沒法阻止佢哋被放血。

香港人，十之八九都想、曾經又或正在參與投資，就讓大家先交交學費好了。今天，我只會勸退休後揸住棺材本的老友，切忌臨晚年才去交學費，因已經再冇時間及機會翻身。至於年輕人，則慳返啖氣，既然想學人投資，遲早都要重重交學費，咁就宜早不宜遲了。

資深傳媒人 曾智華