港男暑期工做保安日行30層樓 苦嘆似軍訓：冇你哋諗得咁好做 前輩傳授搵筍工心得：你唔識揀盤啫｜Juicy叮
不少人都以為保安工作是輕鬆的 hea（輕鬆）工，但事實可能並非如此。一名港男到私樓做保安員當暑期工，豈料中伏，大呻要日行 30 層樓梯打卡，工作似軍訓，忠告「保安冇你哋諗得咁好做」。
不過，有老行家卻隔空反駁，批評工作辛苦只是「唔識揀盤啫」，並大方傳授尋覓保安筍工的心得。詳情見下圖及下文：
港男暑期工做保安日行30層樓 苦嘆似軍訓：冇你哋諗得咁好做 前輩傳授搵筍工心得：你唔識揀盤啫逐張睇↓↓↓↓
樓主：日日軍訓咁 5:15 起身搭車
一名年輕港男前天（7日）在社交平台Threads發帖，大方分享自己對保安工作的看法。他直言：「暑假冇嘢做去考咗個保安牌，依家返緊私樓暑假工保安。日日軍訓咁 5:15 起身搭車，然後喺座頭坐足 12 個鐘頭，仲要冇冷氣，要由 30 樓行樓梯一層一層落去打百幾個鐘（打巡更卡）。」
樓主補充，這份工作連上廁所都有諸多規矩，甚至連手機也無法使用：「屙尿都要有人替你先可以去，手機訊號畀 cctv（閉路電視） 機搶晒，同冇得玩手機一樣，返到屋企必定秒瞓，每日都要返咁滯，一個月得 4 日假，人工又低，請假又醫生紙。」
對於有網民疑惑「手機玩唔到仲唔走，傻豬」，樓主澄清指公司規矩其實並非如此嚴苛，純粹是位置問題：「佢俾帶耳機加玩手機，純粹佢俾個 X 位我，冇訊號。」
樓主最後無奈總結，保安絕非如想像般輕鬆：「最主要係每日 12 個鐘超悶，嗰種悶仲要係想瞓嗰種，但係做保安一定唔瞓得。所以保安冇你哋諗得咁好做，有咩事都係唔好考保安牌。」並在留言區補充「真心要做過先知有幾苦。」
網民旁敲側擊薪酬
這番辛酸感悟引起網民留意，有人推測樓主的年紀並詢問其人工待遇，指出在現時市況下：「19歲做12碼（12小時一更），冇一千蚊日都唔好做」。對此，樓主無奈回應指自己的薪水大約只有「一半多啲（大約 500 多元日薪）」。
有網民驚訝如此辛勞卻低薪，有網民疑惑為何不選擇工時較短的崗位：「做乜唔做 8 碼（8小時一更）呢？又唔係等錢使。」但樓主大嘆暑期工尋求職位不易，自己是迫於無奈才接受：「我見咗 10 幾份，都嫌我冇經驗同太後生。」
亦有熟悉保安行業的同行留言指出，樓主之所以如此辛苦卻拿不到高工資，是因為他入錯了「盤」：「返私樓。單棟式嘅。多數冇乜錢。」
該網民更教路指：「要多錢一定係商廈先多錢。因為你要多錢。即係每一戶要收多啲管理費。仲要 12 碼。其實都知道冇咁多錢請看更所以先 12 碼。所以私樓係最小錢。做就做豪宅區。唔會做單棟式。」
網民：過度美化保安行業
另外，有網民亦指出，現在社會上很多人過度美化保安行業，直言「保安根本惡做！係啲人成日美化以為筍工」、「讀書做過都奇怪近排做乜Ｘ 係咁吹捧做保安，仲要一面倒唱好嗰隻，邊個咁靠害帶起。」
也有過來人深表同感，指所謂好做的盤只是少數：「我明你，我曾經做過保安都覺得係唔會話好做得去邊嘅，所謂好做嗰啲，一係就已經叫搵咗個好少少嘅工作地方嚟做，一係就未做過就覺得好做。但係人工係高啲，後尾就入返去大專院校讀書之後，就想試下做其他行業。」
資深前輩揭物管辛酸
除了一般的入行討論，更有任職物業管理的資深前輩（老 Seafood）現身說法，大爆大堂保安不為人知的幕後辛酸，勸市民不要輕視其工作量：
「物管老 Seafood 想話畀各位知，唔好平時睇到大堂保安好似好得閒，多嘢做上嚟做到 Ｘ 街無人知，剩係跟夏天冷氣滴水一座樓一晚可以幾十單，已經可以跟咗大半日，仲未計日常運作。」
前輩教路：你唔識揀盤啫
不過，也有同行前輩站出來「教路」，指點樓主應該如何挑選合適的保安崗位，笑指他只是「唔識揀盤」：
「你唔識揀盤啫。識人返通宵更睇書睇戲打機玩玩具砌模型刨馬賭波乜都做齊，只要有做足巡樓同唔瞓覺。」並稱「apply（申請） 嗰陣有寫邊區咩類型㗎嘛，派嚟派去多數 event（活動）保安。」
也有網民分享自己在其他屋苑見過極其休閒的「極樂保安」實況，力證前輩所言非虛：
「我住緊嗰度，有冷氣，日更係個伯伯，基本坐喺度，夜更係個阿姐，夜晚經常幾個同鄉喺度傾偈，到了瞓覺時間就瞓，琴晚個替更瞓到已經進入深度睡眠狀態🤣。」
同行：年輕人不應委身屋邨保安
更有同行前輩建議，年輕人不應委身於屋邨保安，應多嘗試其他物管或商場崗位：「做保安唔一定慘，係你唔識揀。咁後生去搵商場 CS（顧客服務）已經差好多」、「其實後生嘅攞咗個牌唔好去做屋邨保安。會悶到你抽筋。最好去啲大商場做信Ｘ呀、ＡＸＭ嗰啲，呢幾個月商場多活動你一定唔會悶，又有嘢睇行行企企周圍走唔會焗喺一個地方。做 show（展覽／活動）嗰陣又有得睇埋一份好快收工。」
有網民也好言相勸，勸勉樓主既然年輕，做保安不妨只做兼職或散工，最重要是趁年輕學一門一技之能，對日後的前途才有實質幫助。
資料來源：hzl_0229＠Threads
相關閱讀：
>>>星島網WhatsApp爆料熱線(416)6775679，爆料一經錄用，薄酬致意。
>>>立即瀏覽【生活百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
