小學畢業30年突約月月聚會 過度熱情惹人質疑另有目的 網民拆解「扮熟」4大動機｜Juicy叮
小學畢業 30 年，突然有舊同學現身約定月月聚會。這份過度熱情惹人質疑另有目的，網民隨即拆解「蓄意扮熟」的4大動機，更有人直言「無事獻殷勤，非奸即盜」，奉勸提高警覺。詳情見下圖及下文：
小學畢業30年突約月月聚會 過度熱情惹人質疑另有目的 網民拆解「扮熟」4大動機逐張睇↓↓↓↓
樓主：熱情扮熟深感古怪
樓主昨天（6日）在社交平台Threads發帖，分享突然有舊小學同學聯絡的疑惑，並透露對方「人哋好熱情」，但自己其實「完全唔認得！」
樓主在帖文中指：「其實啲人小學畢業咗成30年，無啦啦走嚟話要搵返聚下，一嚟就好似好熟好fd（朋友）咁，硬係覺得怪怪的！而家仲個個月話要聚會？有無人試過？」這份突如其來的過度熱情，令樓主深感不解和抗拒，直言不知道如何處理。
網民拆解「扮熟」4大動機
網民紛就事件現身說法。不少人直言，這種相隔數十年的聚會，背後的動機往往不單純。網民更警世提醒，最怕這種突如其來的積極與頻密：「keep（保持）住有聚還好，最驚突然。聚會搞得咁積極咁頻密……當中有人一定有所求所需……睇路！」、「無事不登三寶殿～自己諗啦～」、「一係傳銷、一係保險、一係就嚟結婚。」
•動機一、推銷保險、傳銷甚至騙局：
這是最常見的現實套路，不少網民大感共鳴：「真，有個小同（小學同學）做保險，最鍾意搞呢啲，仲好努力咁搵晒以前全班人嘅電話😂」、「無事獻殷勤，非奸即盜」、「炒幣、傳銷、保險、騙局」。
更有網民大爆自己被舊同事推銷的無奈經歷，指對方突然主動聯絡說「見係 fd 先益我，叫我買健康產品」，結果拒絕購買後對方就再無聯絡：「有，原來係傳銷，佢都係搵食啫。唔買之後搵咗兩次都無買，之後就無再搵過我啦～🥺」。
甚至有網民遇過更明目張膽的手段：「試過10年無搵嘅打嚟同我講呢家喺灣仔賣倫敦金，叫我拎幾皮（幾萬元）玩下」。
•動機二、結帳「被搵老襯」或「人情彈」：
有網民透露曾有同學在聚餐結帳時暗中算計：「有個初中女同學，就想聚愈多次愈好，點解？吃飯埋單從來不會拿賬單給大家看，而我估計每個人的價錢無端端貴了約50%。」
也有人指曾被利用來收「人情」：「我遇過好Ｘ街嘅小學同學，畢業大約10年後（中間完全冇聯絡），佢結婚，搵返好幾個同學請我哋飲，咁大家都諗住聚下同聯絡返，大家都有去，但去完又再次冇聯絡」、「中幾後，斷聯7年，結婚無啦啦死都搭上搭請我飲。然後一直永遠繼續斷聯。」
•動機三、炫耀比較：
網民直言不少久別重逢只是為了暗中較勁：「想互相比較啫！係我唔會去囉～」。
•動機四、純粹吹水客套：
「個個月聚會九成係吹門面說話，我都有小學聚會，依家兩年都搞唔到一次😂」。網民坦言大家各有各忙，根本難以維持高頻率的應酬：「邊個咁得閒個個月去應酬一班30年無見嘅人……」
網民嘆朋友有「階段性」
對於這些流於表面甚至帶有推銷目的的同學聚會，不少過來人直言去過一次就後悔，紛紛表示應果斷斬纜：「去過一次感覺太怪，唔去了」、「去過一次，去之前滿懷期待，去完一次之後 delete（刪除）晒佢哋。」有網民更唏噓總結「最近有個 post（帖文）咁講：回憶留返喺紀念冊就好」。
有網民無奈表示，朋友其實是有「階段性」的，沒必要強求：「我都唔係好明，有啲人總係接受唔到朋友係有階段性，已經用啲垃圾藉口推仲不斷問，好X煩。」
更有過來人分享自己「退 group（退出群組）」保平安的果斷做法：「我去得一兩次都無興趣，連啲 group 都 cut（退出）埋，全都無病呻吟，早安晚安日日都不停。」
網民：如純粹聚舊十分難得
不過，也並非所有人的經歷都如此功利，也有網民分享了溫馨的例外。
有人認為如果純粹聚舊，其實十分難得：「純粹見面聚舊的話，其實好羨慕」、「小同可以搵得返約得到嘅，其實要好好珍惜」、「小學同學部份移咗民，佢哋一返嚟香港就聚下，兩三年聚一次😁」、「一年一次都 ok」。
更有網民分享家中長輩在晚年重遇老同學、一齊慢慢變老的溫暖故事：「可以去吓睇吓啱唔啱傾先，我媽60歲後先有人搞小學同學聚會，佢哋有 whatsapp群組得閒傾下偈，去酒樓聚會，雖然中間斷咗幾十年，但大家一齊變老都幾好呀！」、「我爸媽最近也有小學同學聚會。兒女長大有自己生活，反而空閒。」
也有網民直言隨緣即可：「我都有同同學聚舊。好多時候大家都未必有時間出來。一年又一年。宜家都係隨緣。」
資料來源：ebifffffa＠Threads
相關閱讀：
>>>星島網WhatsApp爆料熱線(416)6775679，爆料一經錄用，薄酬致意。
>>>立即瀏覽【生活百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
