《造星 VI》季軍范卓賢時隔2年再出新歌 自爆駐場辛酸史:俾人噴煙都幾唔舒服丨獨家
26歲《全民造星VI》季軍范卓賢(Jacky)原來參賽前已做過獨立歌手,2024年曾推出出道作《Crush On U》。今年他終於再有機會出新歌,而且一出更半年出了三首之多,成功再實踐歌手路,不過這條路確實不易行,訪問時他更自爆參賽前的駐場辛酸史!文:娛樂組、攝影 : 林賓尼






Jacky最大挑戰是維持生計
Jacky直言未參加比賽前,做歌手最大挑戰是維持生計:「一邊用音樂搵錢,一邊用音樂燒錢,條線好難攞。」讀音樂出身的他以往全靠碌友情卡,搵舊同學幫手,「講心唔講金」慳下不少成本。原來Jacky 參加《造星VI》全因朋友一句話:「佢話玩《造星》會令你之後條路易行好多,你一定要參加!」他坦言當初猶豫參賽是因為自己早已入行,怕被指責「爭位」,但最終憑這句話決心「去馬」!Jacky自認是個「超級大喊包」:「睇節目都知我好易喊,隊員離開又喊、感動又喊!」他說喊只是情緒出口,並非負面的事情,即使男生亦不要怕尷尬,想喊就去喊,不要吝嗇;他更自爆睇卡通《Keroro》都會喊,自認是「高敏人士」!





Jacky酒吧駐唱有不少辛酸
Jacky曾在酒吧駐唱,他說背後原來有不少辛酸!試過駐唱時被食煙客人埋身噴煙:「佢哋會話:『你唱得幾好喎,繼續唱咩歌咩歌啦』,嗰啲位都會唔舒服。」不過也有難忘感動位,有次在太子一間酒吧,客人點唱《酩酊天使》,唱了幾句客人已淚崩落淚,相信對方正在經歷一些事情,他即席再送上一首《繼續繼續》為對方打氣:「嗰次係首次覺得自己歌聲可以感動到人,又感動到自己!」
Jacky冇資格爭新人獎
Jacky簽約MakerVille後工作排到密密麻麻,他直言感恩:「花姐問我會唔會唱得太多,我係好開心,人生冇幾多樣嘢可以令我keep住唔厭!」對於獎項他就佛系表示:「我已經冇資格爭新人獎,反而着眼fans嘅肯定。」他透露2026年目標出四首歌,現在已完成大半,希望挑戰不同風格的作品及工作。
>>>星島網WhatsApp爆料熱線(416)6775679,爆料一經錄用,薄酬致意。
>>>立即瀏覽【生活百答】欄目:新移民抵埗攻略,老華僑也未必知道的事,移民、工作、居住、食玩買、交通、報稅、銀行、福利、生育、教育。
