鍾嘉欣佛山騷孖張柏芝唱《任何天氣》圓夢 摸曾比特攣髮驗真假
「Remember記得‧鍾嘉欣演唱會」佛山站生日限定場昨晚假嶺南明珠體育館舉行，雖然鍾嘉欣（Linda）並非首次在佛山開騷，但反應依然熱爆，全場座無虛席；作為生日限定場，除了特別設置延伸舞台與觀眾近距離互動外，更驚喜邀請了張柏芝與曾比特擔任嘉賓，Linda與柏芝合唱《任何天氣》掀起全晚高潮！
鍾嘉欣第一次面對7千歌迷
鍾嘉欣透露今次作為2026年演唱會頭炮，揀選佛山舉行，源於她喜歡這地方：「上年第一次開演唱喺佛山，好好反應，所以今年都揀呢個地方作起點，今次呢個場館有7千人，第一次挑戰咁多觀眾，事前已好期待，加上佛山呢個地方好有人情味、生活節奏又舒服，仲有好多美食，雙皮奶真係好好食。」為了帶給佛山觀眾驚喜，鍾嘉欣在服裝上煥然一新，歌單亦新增六首新歌，還特別加插一節勁歌熱舞發放正能量；而全晚最意想不到的，兩位重量級嘉賓張柏芝、曾比特登場。
鍾嘉欣視張柏芝為學習對象
鍾嘉欣表示：「兩位嘉賓都係我非常想合作嘅人，曾比特，我喺社交平台睇過佢演出，佢把聲好靚，好欣賞佢，我好好奇佢把攣髮係咪真，一見到佢就想親手摸下；而柏芝，我2013年喺香港開演唱會已經邀請佢做嘉賓，不過嗰時佢檔期唔得，我一直都想再邀請佢，今年再嘗試搵佢，佢真係好Sweet，一口就答應，仲話只要佢個期得，啲工作調前調後，佢都會100%支持，我聽到佢咁講，覺得好感動同窩心。」提到柏芝，鍾嘉欣表示入行初透過朋友認識對方，柏芝是她心中一位大姐姐，好有愛、好願意幫人，她說：「以前當我遇到難題時，我會請教佢，佢都會畀意見我，今時今日再見，呢個大姐姐嘅感覺，仲加咗一種好媽媽嘅親切，作為一個媽媽，佢係我學習對象。」
鍾嘉欣私心唱《任何天氣》
鍾嘉欣與柏芝合唱兩首歌曲：《目的地》和《任何天氣》，Linda指：「《任何天氣》係我有私心，我希望柏芝可以唱呢首歌畀我聽，因為呢首歌內裡歌詞好有正能量。」至於鍾嘉欣就跟曾比特合唱黎明金曲《夏日傾情》，她還笑言跟曾比特合唱，有種找回初戀感覺。問到剛於4月9日生日的鍾嘉欣如何慶祝？她表示：「生日喺香港簡簡單單咁過，好多朋友約我慶祝，但因為今次個唱關係，自己想閉關練舞同歌，唔想食咁多蛋糕，因為要Keep Fit。」
>>>星島網WhatsApp爆料熱線(416)6775679，爆料一經錄用，薄酬致意。
>>>立即瀏覽【生活百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
