西餐廳切餅費「斷磅計」 一磅生日蛋糕「輕輕超重」收雙倍 業界：嚇走客人得不償失

近日有網民在社交平台為朋友發聲，大呻尖沙咀一間連鎖西餐廳「切餅費」準則離譜，餐廳稱按重收費，每磅蛋糕150元，但當事主帶同「一磅生日蛋糕」到店時，竟然上演電影《門徒》情節，員工即場拿出磅秤，放入雪櫃前進行磅重，並指蛋糕「超重」、「輕輕超咗一磅少少」，餐廳以「每磅收150元」為由，堅持按兩磅收費。

事主：買一磅蛋糕要當魚子醬咁磅？

該員工表示，「通常一磅嘅蛋糕，加埋啲生果，會多過一磅㗎，𠵱家見到係多過一磅，所以呢度要收兩磅嘅切餅費」。事主坦言「點會諗到『逐磅計』係用餐廳個磅」，反問「買一磅蛋糕要當魚子醬咁磅？」

帖文又指，事主嘗試向職員理論，質疑「逐磅計」做法過於苛刻，惟遭冷淡回應。經理其後介入，語氣欠佳，最後雖同意只收一磅費用，但全晚都對該桌客人態度惡劣，事主形容是「結果谷住道氣食飯」。據帖文描述，用餐期間「揾極都冇人幫手」：「我朋友問：有冇人可以幫吓手呀？ 經理竟然答佢：想點啊又？咪收咗你一磅錢囉！」

涉事餐廳在餐牌上，以中英文寫明切餅費每磅150元。

有網民認為餐廳「唔識做生意」，反問「個蛋糕大咗少少係咪會死？」

有網民留言形容餐廳做法「肉酸」。

有網民嘆稱「難怪啲人北上消費」。

有網民認為餐廳沒有問題，因為一早已白紙黑字寫明收費。

網民指做法肉酸：第一次聽切餅費斷磅計 

有網民留言形容餐廳做法「肉酸」、「第一次聽切餅費係斷磅計」、「仲要真係拎個磅嚟秤」；亦有網民認為餐廳「唔識做生意」，反問「個蛋糕大咗少少係咪會死」、「有時真係唔好怪人去大陸消費」。

有網民留言希望樓主「開名」避免中伏，樓主亦有放上該餐廳的資料。記者根據留言翻查涉事餐廳網上餐牌，店方的確以中英文標明「切餅費每磅150元」，故有網民認為餐廳沒有問題，因為一早已白紙黑字寫明收費，相反事主「仲迫人哋跟你定義收費」。

黃家和認為餐廳「賺咗一次但嚇走啲客、俾人唱衰仲得不償失啦」。

即場磅重嚇親黃家和：俾人唱衰得不償失

香港餐飲聯業協會會長黃家和向《星島頭條》表示，餐廳以往有收取開瓶費、切餅費等習慣，不過近年市道不景，部分都能免收切餅費，惟高級餐廳仍保留開瓶費。至於「即場攞磅嚟秤」，黃家和也感驚訝，認為餐廳「賺咗一次但嚇走啲客、俾人唱衰仲得不償失啦。」

黃家和坦言，現時餐飲業經營困難，除非「唔憂做」，否則食肆或經理眼光不應太短視，以為額外收費可增加餐廳收入，不但嚇怕客人，更有損名聲。相反，他認為餐廳應提供更多增值服務，讓食客覺得賓至如歸，例如有餐廳知道客人生日，員工更會唱生日歌慶祝。

記者：陳俊豪

來源： ourtoristory @Threads