國際熱氣球節｜江玉歡：全額回水非常應該 直言活動「搵笨」 一半價錢都唔值
【國際熱氣球節/中環/AIA】連日來引發市民不滿的「香港國際熱氣球節」，主辦方終在昨日宣布全額退款。立法會議員江玉歡今早（9月8日）在商台節目表示，退款非常應該，直言活動門票達880元，但形容是「搵笨」，坦言就算半價都不值。
「個場空空如也，冇咩布置」
江玉歡指，當日一開始買了一張燒賣贈券，但隨後才發現不能在現場使用，「係叫你得閒去嗰間公司度買，現場食（燒賣）要另外買。呢個處理真係唔係咁合理。」至於現場的音樂表演，她指環境不太好，「現場咁熱，仲要無凳，要企喺度」，因此當日也只是逗留40至45分鐘，接受傳媒訪問後便離開。
她又提到當日現場所見，一些體積較小、用於展示的熱氣球，也相當「牙煙」，工作人員頗為「淒涼」，要拿着噴火器跟着氣球走，「個氣球會郁㗎嘛，佢（工作人員）要扶住個鐵馬借力固定，氣球漲咗又會郁來郁去，都幾陰公，要跟住個氣球隨處走，都幾危險，仲要拎住個噴火器。」
花880元情願去演唱會
江又指，實際上那些小型熱氣球「唔係好精彩」，況且見到工作人員如此艱辛地「跑來跑去」維持位置，所以現場氣氛都不太好，「個場空空如也，冇咩布置，得個台有人唱下歌。如果880蚊咁樣去，我真係情願去聽演唱會。」被問到如何概括整個活動，江玉歡直言：「有啲搵笨，就咁睇氣球嘅話，一半價錢，440蚊，我都覺得唔值。同埋你見啲人喺中環海濱跑步，個個企喺度影相，喺外面都睇到啦。」因此她認為全額退款十分應該，參考外國，如英國、新加坡等，去年也有一些「搞到好失敗」的活動，都會全額退款。
江玉歡認為，今次活動對主辦單位及政府而言也是個教訓，這類廣告宣傳，政府不可以完全沒有管制，如果最後名不符實，影響消費者之餘，是會間接影響香港的形象，「政府亦都唔可以話完全唔影響自己」，日後這類大型活動，哪怕政府沒有「落水」舉辦，都要參與多些，不只是「批准者」，亦要是「促進者」。
相關新聞：
熱氣球節︱主辦單位致歉 承認體驗未達期望 安排全額退款 即睇申請詳情
>>>星島網WhatsApp爆料熱線(416)6775679，爆料一經錄用，薄酬致意。
>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。
