唔快樂唔快活｜曾智華

老友肥H，專買家傳戶曉集團的餐飲股票，認為自己熟悉其品牌，兼可以親身光顧，掌握業務旺淡。多年來，一直揸住多隻香港人個個熟悉的餐飲股：（一）大快活（052）；（二）大家樂（341）；（三）稻香集團（573）；（四）富臨集團（1443）；（五）龍皇集團（8493）。

除大快活及大家樂，全部已變毫子股及仙士股，喊到收唔到聲。

一字記之曰——斬

早在十年前，我已忠告佢切勿揸中式餐飲股，因飲食業龍蛇混雜，大量人透過不同手法掠水（我知，因算做過吓！）。另外，餐飲業員工入行門檻低，故由管理到前線員工，皆良莠不齊。

個個集團上市前，皆有公關專家塑做形象，始創者給人一副努力奮鬥終捱出頭形象。可惜，全部止於此。一旦成功上市，不少本來優良的管理立時跌watt，由外殼爛入心，自然反映在股價，如今冇乜機會翻身了。

肥H揸到成手難再見家鄉股票，問我點？一字記之曰——斬！冇眼睇，不回頭！

但佢深深不忿，因日日幫襯大家樂大快活，但見生意不俗，背後的羅氏家族是正派商人，應會努力交代自己，交代品牌的。

面對三座難以跨越大山

「肥H，對，羅氏乃香港傳統名門，經營生意必不會蠱蠱惑惑。但大勢所趨，你想大快活重見40元（上市高位）及大家樂重見30元（上市高位）？唉……已沒可能了。如今一隻5.6元、一隻7元，揸住當然唔快活，也唔快樂。睇圖表，兩間公司的股價，皆由2016年高位不停下瀉，下降軌明顯又堅實，好難有機會反彈。

另外，數字會說話，兩個集團無論如何努力經營，仍須面對三座難以跨越的大山，包括：人工、原料、租金。三者之中，最惡搞為人工，年年不斷升，只有增冇得減。

睇完兩大集團剛剛發表的業績報告，相信任何股東都會洩氣。因所獲的利潤除以分店總數目，大家樂每店每月只賺11.5萬元。大快活更冇味，只得4.3萬元！總結，咁奀，仲做嚟為乜？揸住佢地股票，又點可以快樂快活呢？

資深傳媒人 曾智華