專欄 蘇哈仔│曼聯買狼王+蜂王配魔王 艾摩廉係時候交成績

曼聯終於買到麥比奧莫，加上放走拉舒福特，今夏的轉會工作應該完成大半，餘下時間全力清走查頓辛祖、安東尼馬菲奧斯等冗員。有麥比奧莫、又有馬菲奧斯根夏，加上隊長般奴費南迪斯，3人都需要球權，今次真正要考驗魯賓艾摩廉的功力。

艾摩廉上季中途接手，帳面成績無改善，最後更失落歐霸，球迷對他的評價兩極，有人指他和前任們一樣；亦有球迷指班底不是他建立，球員不適合其風格，應該要俾時間他證明。如今證明時間到了，曼聯先用違約金買斷根夏，之後又多次追價完成麥比奧莫的轉會，以傳媒一直以來的報導，兩人係紅魔的頭號和第2目標，即係球隊按艾摩廉的意願買到他的心頭好。

有適合的兵，艾摩廉就要露兩手。從上季的踢法來看，靠左路的根夏屬於左路核心，喜歡大量持球突破和策劃攻勢；而麥比奧莫就係右路核心，同時要佔取球權去發動進攻。而曼聯隊內本身亦有喜歡控制比賽的般奴費南迪斯在陣，狼王、蜂王再加魔王，點樣分配真係十分考驗領隊艾摩廉的能力。

艾摩廉上季「巧婦難為無米之炊」，今季俾到資源佢，就應該要交成績。蘇偉業