黑色話劇《唔講得》9月重演 葉童新嘗試由鬧交變「唱」對方 與黃德斌再合作有熟悉距離感

由葉童、黃德斌領銜主演的舞台劇黑色喜劇《唔講得》，去年11月在香港文化中心大劇院的首演叫好叫座，早前於吉隆坡及廣州兩地的巡演也獲取了空前成功。本劇將於9月4至7日在香港文化中心大劇院重演，現因觀眾反應熱烈，更特別加開9月6日下午2時30分場次。

葉童、黃德斌現場互「唱」

葉童、黃德斌領銜主演的舞台劇黑色喜劇《唔講得》。

葉童、黃德斌等近日進行新一輪排練。

葉童指今次同德斌再合作有一種熟悉距離感。

葉童指今次新嘗試係同德斌喺個劇度本來係鬧交變了「唱」佢。

舞台劇黑色喜劇《唔講得》。

葉童、黃德斌等近日進行新一輪排練，德斌說：「呢個劇過咗咁耐再喺香港重演，對我嚟講係一個新鮮嘅體驗，因為今次有啲唔同，特別係音樂方面嘅處理方式，我會當佢係一個新嘅劇去做！」葉童表示：「我同德斌係上年合作呢個劇，之後我哋去咗幾個地方演出，9月就會喺香港重演，大家都好開心。今次同德斌再合作有一種熟悉嘅距離感，唔知係咪一種感情嘅昇華，就好似要行番遠少少去觀望佢，去體會佢嘅感受嘅嗰種感覺，我唔知德斌佢點諗，但我覺得佢好似迴避緊我，佢開始對我有距離感！冇嘢嘅，我接受到嘅，有啲你唔想講嘅就唔好講，我明有啲嘢係唔講得嘅。今次重演我哋有個新嘗試，呢個新嘗試就係我同德斌喺個劇度本來係鬧交，鬧鬧吓就不如『唱』佢好似好啲。」德斌：「我哋會係現場互『唱』，將𥚃面一啲心底話『唱』出嚟！」葉童續說：「我唔單止會獨唱樂壇大姐大嘅歌，我仲會同德斌合唱一首天王天后級嘅歌，去『唱』出我哋係劇入面嘅心情。我哋一直以嚟都係用對白呈現感覺同故事，今次就將我哋嘅心情用歌曲呈現，我有一種『唱』德斌唱得好澎湃嘅感覺，我會周圍去『唱』佢。」

楊永德：「觀眾睇《唔講得》呢部劇唔單止係睇劇情，後面重有好多深層次。」翁煒桐：「香港嘅觀眾睇過第一次就會食過番尋味睇第二次，再睇會睇得更加深入。」李俊樂：「今次我再喺香港參予《唔講得》，心情有啲緊張，𥚃面有啲新歌同音樂都要再準備，劇情都有改動，所以我都好期待。」