Edan透露Anson Lo康復進展良好開始練舞 談姜濤遭受質疑︰最緊要佢而家OK

MIRROR成員呂爵安（Edan）與花劍運動員蔡俊彥、小儀，今日（4日）出席「KALOS x SQUID GAME 3期間限定店」開幕禮。對於證實加盟韓劇《模範的士3》演出，更大曬與劇中演員李帝勳、金義聖及裴侑藍等的合照。Edan表示感恩有機會可參與外地有口碑的製作，他跟李帝勳有很多對手戲，並籍此機會跟對方學習。

Edan《模範的士3》角色不用說韓文

Edan說：「我個角色冇講韓文，佢哋英文好叻，主要以英文溝通，呢部劇預計今年年底播出。」談到衝出香港拍韓劇，不少「爵屎」戥他高興，Edan笑言有得參與好開心，從未想過，深感「呢件事太黐線」，希望將來跟MIRROR隊友都有機會參與外地製作，大開眼界。Edan又大讚當地製作快手又專業，事前準備十分充足，值得他們參考學習。

提到將於8月16至17日兩日舉行《EDAN LUI "e to E" LIVE 2025》演唱會，優先預訂門票於40分鐘內售罄，現場「爵屎」大叫要求加場。Edan說：「好開心今日賣晒飛，希望可以加場，如果可以嘅話加咗一場先。」他表示完成手頭上工作後會「閉關」，為演唱會作準備，除了練歌、練舞之外，都會練定肌肉，笑指視乎「騷」幾多，服裝形象方面還要未落實。

Edan今日（4日）出席「KALOS x SQUID GAME 3期間限定店」開幕禮。

Edan有大批「爵屎」支持。

Edan將於8月16至17日兩日舉行《EDAN LUI 'e to E' LIVE 2025》演唱會。

Edan演唱會優先預訂門票於40分鐘內售罄，現場「爵屎」大叫要求加場。

Edan說：「好開心今日賣晒飛，如果可以嘅話加咗一場先。」

Edan表示完成手頭上工作後會「閉關」，為演唱會作準備。

Edan將「閉關」練歌、練舞，都會練肌肉，而服裝形象方面還要未落實。

Edan與花劍運動員蔡俊彥、小儀一同出席開幕禮活動。

Edan說同姜濤排舞見面，「佢OK，大家唔使擔心！」

Edan同Anson Lo排舞見面，表示「佢已經跳緊舞」。

Edan支持者眾。

Edan支持者眾。

現場有大批執法人員。

Edan認真睇緊活動流程。

Edan離開時不停揮手，再引起騷動。

Edan離開時再引起騷動。

姜濤上月（24日）在西區失足墮海幸獲救，翌日（25日）如常與Edan、Anson Lo、Jeremy到旺角麥花臣出席行「《呂濤米Lo Seoul》旅友旅途分享會」。

分享會上，有傷在身的Anson Lo笑容滿面。

Edan談姜濤被盧覓雪質疑

提到姜濤早前發生墮海事件，Edan坦言當時睇到新聞感到愕然，也立刻關心對方有無事。他說：「我哋之後排舞見面，佢都OK，所以大家唔使擔心！」談到不少人擔心姜濤情緒，Edan坦言作為隊友、兄弟會作出最大支持和鼓勵，隊友間有甚麼事情也會互相關心。對於早排在旺角麥花臣舉行「《呂濤米Lo Seoul》旅友旅途分享會」取消了與粉絲遊戲的互動環節，並延期至7月29日再次舉行活動，Edan說：「我都係聽公司安排，相信姜濤都想做呢件事，希望大家安心。嗰日可能太趕，啲粉絲到晒喺會場出面，所以唔想大家一場嚟到失望，就同大家見吓面、影相、Say Hi！之後會補返同大家好好見面。」至於姜濤發生墮海事件後，商台主持人盧覓雪於節目《在晴朗的一天出發》中，批評姜濤的言論，質疑睇日落說法。Edan說︰「我覺得每人睇每件事，大家有唔同睇法，可以有唔同意見。姜濤咁講，我就咁聽，大家唔需要有太多猜測，最緊要佢而家Ok！相信佢都唔會再做錯誤示範。（有指盧覓雪係「姜糖」）係咩！我相信佢都係關心同行後輩情況，先有呢個睇法，其實大家喺呢個圈，對呢件事都關心，我見到大家對呢件事好關心同擔心。」

Anson Lo已可排舞

提到Anson Lo早前做完手術，Edan表示他當然知道，別人的私隱不談，對方手術順利，康復程度佳。他說：「呢幾日排舞見到佢，佢已經跳緊舞，大家唔使擔心，稍後佢都會上台表演畀大家睇。」提到隊友接二連三出事，問到是否不夠時間休息？Edan說：「如果我哋有唔舒服，可以同公司講『可唔可以唞一唞？』公司會配合，當然唔可以亂嚟！公司無可能逼到我哋，係有自主權。」